Aizawl: Mizoram Pradesh Congress Committee (MPCC) chuan Forest Conservation Amendment Act, 2023 (FCAA) chungchangah MNF leh ZPM chu inbei tur bik an awm lo va, mawhphurtu ve ve an ni tih an sawi.
Nilainia an thuchhuahah Congress party chuan, BJP leh a thawhpui NDA sorkarin parliament-a dan tha lo tak a siam, ZPM sorkarin Mizoram Asembly House-a FCAA pawmpuina resolution a pass chu Mizoram tana pawi tak anih avangin tha lo an tih thu an sawi.
Congress party chuan July 26, 2023-a Parliament-a he bill sawiho a nih khan Congress MP-ten nasa taka an dodal karah pass a nih khan, MP (LS) K Vanlalvena chu BJP lamah a thu ngei tih sawiin, tunah MNF in FCAA an dodal leh si chu thil inhmeh lo tak a ni tih sawiin, “MNF hian he FCAA hi an dodal tak tak a nih chuan, he dan siamtu BJP an thawhpuina NDA hi chhuahsan se, BJP nen an thawhdunna hi chhuchat ngam rawh se,” an ti.
Congress party chuan kum 2019 MP inthlan dawnah MNF party chu Citizenship Amendment Bill (CAB) do turin intiam mah se, thlan tlin an nih hnuah Lok Sabha-ah a bill thlawptu an ni tih an sawi a. CAB an thlawp chhan NE state a huam ve lo nia an sawi ang khan, FCAA-in NE state huamtir ve lo tura an thawhpui NDA sorkar an nawr thlu thei a nih loh chuan, FCAA dan pass tute zingah MNF MP an tel avangin he dan hi do ve thei an ni lo tiin, Dampa by-election vote zawnna avanga total bandh neiah MNF te hi an ngaih thu an sawi bawk.
Dampa bial hi Bangladesh hnaihte an nih avangin FCAA tuar ber tur an nih avangin, he dan tha lo tak pass-tu zinga tel, BJP leh an thawhpui MNF te, Mizoram Assembly a resolution pass-a lo pawmtu ZPM te hi Dampa bial mipuiten lo hnawl turin an ngen tih sawiin, FCAA duhlotu tak tak party chu Congress party chauh an nih thu an sawi bawk.