October 22 leh 29 inkara Madurai, Tamil Nadu-a Yonex-Sunrise All India Junior Ranking Badminton Tournament 2025-ah Sainunmawia Sailo, Ramhlun Venglai leh Zoramthari Renthlei, Champhai Vengthlang chuan Mixed doubles-ah bronze medal an vaw chhuak.
Thartei hi kum 15 leh thla nga niin Mizo zingah national level badminton inelnaa junior (U-19) category-ah lawmman la thei naupang ber a ni thar a. A hmaa kum 16 mi nia record lo siam tawh, H. Lalthazuala a khum a ni.
Round hmasa berah Mawia leh Thari hian player tha, Akash Singh leh Ananya A te an tum a, 6-21, 22-20, 21-19-in an hneh hram a. Round of 16-ah Seeded No. 4 Karamat Ul Haq Mohammed leh Deepika Devanaboina te tangdun chu 21-16, 21-9-in, awlsam takin an hneh thung.
Quarter final-ah Seeded No. 7 Divyansh Agrawal leh Skledeep Kour inkawp lakah 21-18, 21-18-a hnehna chang lehin semi final an lut.
Final luh inchuhnaah Harish Ragavendiran V. leh Rubika Kumaran tangdun chu 11-21, 22-20, 17-21-in an hneh ta lo va, hetah pawh hian an chak zawk teuh hle a, deciding game-ah phei chuan 17-14-in hma an hruai hman.
Tournament-ah hian Mawia hi Malsawmhlua nen boy’s doubles-ah an inlan bawk a, round of 16 an thleng a. H. Lalrinhlui leh a partner pawhin mixed doubles-ah round of 16 an thleng ve bawk.
Hetianga Mizoram tihmingthaa medal la thei player an awm belh hi Mizoram Badminton Association (MBA) chuan lawmawm a tiin player-te a chhuang a. Hmasawnna nasa zawk leh hlawhtlinna ropui zawk nei chho zel turin duhsakna a hlan.