LESDE Mizo Idol Season 8 intihsiakna neih mekah Top 5 result puan niin, thawhlehni zana result puanah Top 7 zingah tla bik an awm lo — Top 5-ah an tling vek!
Top 7 intihsiaknaa taksa lama harsatna nei a, che tha viau lo Dawrpui Vengthar tlangval Zomuansanga’n mak tak maiin Top 7 a paltlang. A hla thu theihnghilhte chu mipuiin an theihnghilhsak duh lo va, a zai ngainatu tam tak hmangin Top 5 a inhlangkai nawlh mai. Mipui vote avangin stage sang zawk a thleng.
Zomuansanga tan bik, tun anga a che chhe leh a nih chuan a tan Mizo Idol intihsiakna mangtha mai loh chu tihtheih vak a neih a rinawm tawh loh! A chhan chu, Top 5 atangin viewer ngahin awmzia a neih tawh hmel loh!
Upper Republic tlangval Laldinsanga pawh dinhmun hlauhawmah a ding hman. Top 7 intihsiakna — Lam Ang Aw — hmanga rawn khuhhawngtu hi judge Jaui’n, “I chau deuhin ka hria, zanin chu…” tia a comment kha a ni a. A che vak lo niin a lang. Mahse, a tan vanneihnain par a chhuang a, judge-te’n an thuneihna hmangin a chungah khawngaihna an lan tir a, an chhanhim hram.
Top 5 result puanah hian Zomuansanga leh Laldinsangate pahnih tih loh chu chhan ngaia awm an awm lo.
Thenzawl Diva Remlalvuani’n a hla thulkhung hmangin Top 7 paltlangin Top 5-ah a inhlangkai a. Tuikual South tlangval, tun stage chinah pawh mi tam tak Idol ni der tawh Emmanuel Lalremruata pawhin a stage performance leh zangkhai tak, ngaihnawm tak sia mipui a awi chu a tlinpui lehpek.
Mipuiin views hmanga top 7-a an hlankai, Mamit Hmar Veng tlangval Lalthakima pawh a che sual nawn tawh lo. Top 7 intihsiaknaa boruak a rawn ngamna chuan mipui inthlan sual tir duh hauh lovin hmalam a pan a, Top 5-ah a inhlangkai a. Top 7 intihsiaknaa judge te fakna aw-ka dawngtu Chamring nula, Vanlalneihpuii pawhin intihsiakna sang zawk hmachhawn zel turin Top 5-ah chiang takin a inhlangkai a. Mi tam tak star rawn, Champhai Vengthlang ‘chhass’ Sylvia Malsawmpuii’n Top 7 intihsiaknaa thiam tak maia Rebecca Saimawii hit — Ka Thlang Ber Che — chu round sang zawk a tlinpui bawk.