Nimin 29 Oct., 2025 ah MNF party huaihawtin tunhnaia Mizoram assembly in central lamin an lo pass tawh Forest Conservation Amendment Act 2023 duh lohna entirnan Mizoram pumah total bandh neih a ni a. Mipui pawnchhuah khap chu tluang taka neih niin, buaina leh harsatna a thlen phah hriat a ni lo. Chawhnu dar 1 ah mipui ten bandh an zawm that avanga lawmthu sawi nan bandh chu tihtawp hma zui a ni.
Mizoramah hian lungawi lohna avangte leh sawrkar karna atana bandh huaihawt hi a awm ta zeuh zeuh a. A tlangpuiin zawm a hlawh viau thin. Zawm a hlawh em em thin e kan tih rual hian mipui thinlungin an thiltih kha an thlawp vek tihna erawh a ni kher lo bawk. Tun tuma bandh pawh hi opposition party lam huaihawt a ni a. Sawrkar lai thiltih, an duh loh avanga dona chu ruling party, a do ber chuan thlawp thu a awm lo va. Mipuiin an thu zawm mahse ruling party lam pawhin an thlawp tihna erawh a ni kher lo va, ngawi rengin an thlir liam ve mai a. A tha khawp mai. Hei hi in tawngpawng nawr a, an bandh lo bawhchhiat luih emaw ai chuan a mawiin a zahawm zawk hle a ni. Kan zonun zemawi a inzah der tawnna lantirna pawh a ni bawk. Sawrkarna changa rorelna te chu an inchhawk tawn fo a, leh lam pawhin an la tih duh hun a awm thei. A pawimawh berah chuan buai nuai nuai lo va thiltih hi a tha ber fo.
Hnam tlemte, inlungrual tham lek kan ni kan tih rual hian mihringah ngaihdan hrang hrang awm thei vek a ni a. Amaherawh chu kan ngaihdan ni lo deuh pawh inzahtawnna avanga kan in dawh thei lai tak hi hnamdangte tana entawn tlak kan nihna lai a ni fo. Vaihoah hi chuan lehlam thiltih chu chawhbuai, hlawhchham tir hrim hrim tumna, inhmaizah tawnna awm reng reng lo an nih avangin buaina nasa tak a chhuah phah thin a, hei tak hi vaiho nena kan danglamna chu a ni.
Chutih rualin kan ram rethei takah hian hnathawh thulh a, a ram pum pui chawlh ang hi chu tih fo chi a ni lo tih kan hriat a ngai. Nasa taka hnathawh ngai em em te hian kan ram dinhmun hre rengin loh theih lohah te a nih loh chuan bandh hi chu huaihawt loh a tha ber mai.