Aizawl: MHIP Shillong Branch-in NEC Auditorium-ah an branch Silver Jubilee chu Ningani khan an lawm a. Chief Minister Lalduhoma chuan khuallian niin a hmanpui a, Baryl Vanneihsangi, MLA chu khualzahawm a ni.
Chief minister chuan MHIP member-te lawmpuina hlanin Shillong Branch MHIP chu Zofa, Shillong-a khawsa leh zirlaite, damlote tan an tangkai thin a. Mi tam tak tan malsawmna a lo ni tawh thin. Shillong-ah MHIP Branch a awm tih an hriat ringawt pawhin an thla a muang a, hna tam tak thawk lo va an inhriat lai hian mi tam takin an thlamuanpui thu a sawi.
State pawn lama Mizo awmte hi Mizoram aiawhtute an nih thu sawiin chief minister chuan, miten an hmuh dan chu Mizo mipuite hmuh dan a nih nghal zel avangin, zilh leh han zirtir ngai an awm pawhin lo zilh hreh lo turin a chah a. YMA nena tang tlangin Mizoram leh hnam hmel timawi lo thei lakah leh khawtlang nun siam that kawngah tang tlang zel turte, Meghalaya-a awm Zohnahthlak sorkar hnathawkte leh DRC-te nen kawng engkimah lo thawkho tur leh Zofate huikhawm hna kalpui zel turin a chah.
MLA Baryl Vanneihsangi pawhin thusawiin, Shillong Branch MHIP te lawmpuina a hlan a, Shillong leh Meghalaya state khawsa Zofate tana rawngbawlna tha tak tak an lo kalpui tawhnaah lawmthu sawiin, an kal zelna turah duhsakna a hlan.
Silver Jubilee lawmna inkhawmah hian MHIP Shillong Branch President Lalhmingliani pawhin thu a sawi bawk.
MHIP Shillong branch-ah hian tun dinhmunah member 375 vel an awm mek a ni.