Dampa bial bye-election a hnai zel a, party tinte leh candidate te pawhin thapui tak meuh thawhin theihtawp an chhuah zel.
Party tinin inlawmluhsiak boruak an nei chho zel a, nitin boruak thar hriat tur a awm chho ta reng bawk.
Ral atanga lo thlir ringawttu tan chuan boruak siam thiam party apiang an tlin chhoh mai a rinawm a, thawm siam na thiam apiang boruak a kang niin a lang bawk.
Mahse, ngun deuha ngaihtuah ngai chu hnam tlem zawkte khu an ni. Minority awmna bial a nih avangin mahni mi leh sa a chhawlchhin ngawt theih loh a, party te pawhin ngaihthaa awmsan ngawt theih an ni lo.
Anni ho hi therhlo ngaihven, sum hmanga lei theih tam tak awmna an ni a, hei hi kan ram inthlan hmai la tibal fotu an ni bawk. Political party lam pawhin ngaihven chin tawk an hriat a tul hle.
A lehlam zawng tak chuan tlin leh tlin loh hril theitu an nih miau lawi si avangin ngaihven loh theih an ni bawk si lo. Chin tawk neia political party tinte pawhin en dan an thiam erawh a hun hle.
Engpawhnise, Dampa lam kan hawi a, kan thlir a, Mizoram hmel lanna tur pakhat a ni tih hrerengin, i ngaihven zui tlang zel phawt mai teh ang u.