- H. Lalhmachhuana, Zobawm In
Development (hmasawnna) kan tih thin hi, a nihna tak (awmzia) leh neih theih dan kawng dik chu Mizo mipuite hian kan la hre fuh lo tlang hle niin a lang.
Hmasawnna ruhrel (development infrastructure) te an awm nual a; chung zinga hmuh theih mai: (a) Transport System te, (b) Power and Energy lam te leh (c) Water Supply System te hi an pawimawh em em a, chutiang te kan neih chuan hmasawn ta (developed) em ema kan inngai hi a dik tawk lova. Institutional Infrasturcture (human/social development) an tih maite kan neih that loh chuan hmasawnna dik a neih theih ngai loh a ni. Chungte chu- 1) Political Institution 2)Educational Institution 3) Health and Nursing Institution 4) Recreational Institution 5) N.G.O Institution leh a dangte an ni tlangpui a. Heng Institutional Infrastructure te chhawr tangkai that chuan development hi a kal dik fova. Khawvela ram rethei zawkte chu hmasawn tawh zawk rama N.G.O. leh Kohhran te’n Education leh Health System te an zirtira an kaihhruai avangin hma te an sawn phah ve thin (Mizoramah pawh) tih kan hria.
Economic subject lam zirmi te chuan ‘sum leh pai’ (hmuhtheih material thil) neih belh teuh hi chu development tih aiin ‘growth’ (thil neih lama thang) a ni a, development chuan mihring leh khawtlang nun peng hrang hrang Human/Social Development-in a huam (moral, health, education, eizawnna, culture etc.) te an than tlan zel (progress) theihna a huam vek an ti a. Bible thuin a sawi (t Kor.12), taksa pumkhata peng hrang hrang awmte chu a tuartu bik awm lova, a tuartu tur pawh intanpui tawn leh a tul huna inchawimawi thei an nih thu a sawi ang hi development kawng dik zawh a lo ni reng mai a; Human Development leh Sustainable development te hi a huam tel vek a ni.
A thangduang bik awm vanga tuar lai bik an awm phah chuan hmasawnna dik a ni thei lo fo mai. Switzerland ram chu khawvel puma ram hausa ber (per capita income) an nih hun lai chuan an nawmchen nasat avangin mitthi an neih tam ber hun a ni e an ti a. “Miin khawvel hi a pumin nei sela, a nun chan si sela a tan eng nge sawt angt” Bible-in a tih ang hian sum leh pai (materialism) neih bakah thil tul dang neih leh nihna tur pawimawh dangte neia ni thei tur chuan Institutional Infrastructure (eg. Kohhran, education, health) te chhawr tangkai an tul thin. Tin, mi thenkhat phei chuan ram develop tehna atan sum lakluh tam dan bakah Longevity (damrei dan) te, Literacy (lehkkha thiam dan) te, Happiness (mipuite hlimna) te thlengin an telh hial a ni.
Tunlai khawvel thangchho zelah hian Mizoramah pawh hian ram changkanna hmanraw hrang hrangte kan neih belh ve zel a. Kawngpui liantha takte pawh kan neih belh zel bakah Rail Road pawhin kan khawpui daifem a rawn chhun thleng ta hial mai a, company lian leh hausa tak takte pawh an rawn inbun zung zung mai thei a; tin, mi tam tak chuan sum hmuhna leh eizawnna remchangte kan neih chuan a lawmawm hle ang a; chutih rualin kan Zonun ze mawi (tlawmngaihna, aia upa zahna, Kristian nun) te kan malmak phah a hlauawm thei ngei mai thei. Hetiang hunah tak hian, hmasawnna ruhrel thenkhat a than nasat hle lai hian, hmasawnna Institution thenkhat dang (N.G.O., Kohhran etc.) te leh Political Institution (sorkar) ten tan kan lak nasat a tul dawn tak meuh mai a ni. Kan Zonun ze mawi, kan identity te min assimilate (eichhe) thei laka inven leh inkaihhruaina tha hman nghal a pawimawh dawn – ruihhlo do te, I.L.P. leh Illegal Trade ang chi te ngaihthah chi a ni hauh lo mai. Heng Institution te hi lungrual leh inthurual a thawh a tul hle ang. Ram leh hnam tana pawi tur (Sustainable Development tichhe thei) thil ti-mimal/company te an awm palh chuan chutiang chu hnawl tur leh titawp tura tan lakho a nih zel chuan development zedik kawng kan zawh thei dawn a ni si a.
Tunah chuan hmasawnna tluantling (development) hmanraw pawimawh (infrastructure) te kan hre ta a. Heng zinga Political Institution (sorkar) tha neih hmasak phawt a tul kan tih chuan a dik thui thei viau a; chutianga Political Institution tha/sorkar tha nei tur erawh chuan finna, hriatna, remhriatna leh tumruhna te neih leh chhawr dik ngei a pawimawh thung a ni; Human & Natural Resources te dapchhuah leh rorelna dik neih te a tul si a. Mizoram pawh hian kawng dik leh diklo kan thliar thiam theih nan ram rorelna kawng lo zawh tawhtu te rorel dan tlem tarlang ila —
1) Lal Rehoboama chuan mipuite chunga rorelna a kenkawh dan tur atan a pa (Solomona) dam laia a upate thurawn (thutha sawi turin) te aiin a bul hnaia tlangval hote thurawn (phur tihrih belh turin) chu a pawm zawk avangin Israel hnamte chu an inthen ta phawk a ni tih kan hria. Hriatna leh finna kawnga tawnhriat nei leh miril zawk (upate) thu a pawm duh lo kha ram mipui tan a pawi tak meuh a ni.
2) Kum 1990 vela India ram economy tluchhe nasa em em chu siamtha turin Prime Minister P. V. Narasimha Rao-a (Ministry) chuan Economist ropui tak Dr. Manmohan Singh-a chu kum 1991 khan Union Finance Minister ni turin an sawm lut a, tichuan a ni chuan kum 3 vel chhungin India ram economy tlusawp tawh chu a dinthar leh ta a. Kum 1994 atang phei kha chuan Manmohan Singh-a chu India Prime Minister a ni ta tih kan hria.
Tichuan Mizoram hian kan ram hruaitu atan Lal Rehoboama ang nge kan duh Pu P. V. Narasimha Rao-a/Dr. Manmohan Singh-a ang hi let Kan hruaitu ni tawh leh ni mekte hian a tu hi nge an an zawk le?
Aw le, kan sawi tak angin khawvel inherdanglam zelah hian Mizoram pawh hi kawng thenkhatah changkanna ‘growth’ chuan min chim chho ve mek a; Communication Channel (social media, Road/Railway Transport ang chite) lamah kan thang nasa zual ni pawhin a lang. Hetianga kawng thenkhata kan than duan bik hle chuan kan ram leh hnam nun dan tha leh nihphung tha te a eichhiat (assimilate) theih avangin inven uluk a pawimawh ta a. Hetiang hunah hian Development ruhrel zinga Institutional Infrastructure, a bikin Political (Sorkar) leh N.G.O. hote tanho a tul tak meuh mai, chuti lo chuan hnam ralna tur (leh chimralna) kawng kan zawh thei dawn si a. “Mi rawnin i thil tumte buk la, fel taka relin hmelma bei rawh” Bible-in a sawi te leh “tanrual hi chakna a ni” (ram leh hnam himna kulhpui a ni) tih thu te hi Mizoram hian, a bikin ram hruaitute hian, kan zawm a va tha dawn em!