Aizawl: Health Minister Lalrinpuii chuan damdawi in hrang hrangah pharmacist mamawh a san thu leh thingtlang PHC leh CHC-ah te post ruak a tam thu a sawi.
Blessino Nursing School 7th Capping, Lamp Lighting & 4th Graduation Ceremony chu nimin khan Health Minister Lalrinpuii’n khuallian niin a hmanpui a. Kum tina mi 60 zir theihna tur, Blessino Pharmacy Institute a hawng nghal bawk.
Khuallian Health Minister chuan Blessino Group of Institutions-in bung thar kaia, Pharmacy Institute an hawng thei chu ropui a tih thu leh Mizoram chhunga pharmacy zir turte tan lawmawm a tih thu a sawi a. Pharmacy chu profession hlun leh zahawm a nih thu sawiin, damdawi in hrang hrangah pharmacist mamawhna a san thu leh thingtlang PHC leh CHC-ah pharmacist post ruak a tam thu a sawi.
Health Minister chuan mipui hriselna atan nurse leh pharmacist-te chu an pawimawhin, mawhphurhna sang a ken tel tih sawiin, dam lo enkawl piah lamah hriselna kawnga mipui vantlang zirtira kaihruai tura hma la tura sawmin, khawhawi tizauva foreign-ah leh sipai lama hna zawng turin a fuih.
He hunah hian nursing zir chhuak mi 26 te thlahna leh lut thar mi 30 te lawmna hun hman a ni a. Mizoram State Planning Board Vice Chairman Dr. Kenneth Chawngliana, VL Muanpuii, Principal, Blessino Nursing School leh Dr. Zothanmawia, Principal, Blessino Pharmacy Institute-te’n thu an sawi.
Madam C. Lalrintluangi, Principal, College of Nursing, Synod Hospital Durtlang-in Capping leh Lamp Lighting a kaihruai a. Dr. C. Lalramdini, Asst. Professor, College of Nursing, RIPANS-in certificate semna leh graduate tharte lawmpuina hun a hmang a. Managing Board lam atangin Merit Prize semna leh subject topper-te chawimawina hun hman a ni bawk.