Aizawl: Revenue Minister B Lalchhanzova chuan tlawm ve lo Ropuiliani anga hnam dang laka tlawm ve lo tur chuan thangtharte chu thiamna lamah an intuai hriam a tul takzet tih a sawi.
Denlung khuaah lungdawh leh thlan hi Ningani khan minister-in a hawng a. Lalnu Ropuiliani thlan hawn tak hian mi tin thinlungah hnam tana inpekna tuh thar leh se, chumi atana pawimawh rinawmna, huaisena leh mahni hnam tana din ngheh tlatna rilru pu theuhva, midang tih tura dah lo va mahni mawhphurhna theuhva dah turin kalkhawmte a chah.
Lalnu Ropuiliani atanga entawn tur pawimawh tak chu a tlawm ve lohna nun a nih thu sawiin B Lalchhanzova chuan, Mizo hnam hi hnam dang laka a tlawm ve loh nan chempui leh tharum a tawk tawh lo va. Zirna leh thiamna lama intah hriam hi hnam humhimna pawimawh ber zinga mi a ni tiin, chumi tur chuan zirna leh hna theuhvah rinawm a tul tih a sawi.
Revenue minister chuan department a chan hnuah ram inches khat pawh a thlawna a dawn ve duh loh thu sawiin chutiang bawk chuan rinawm takin mahni tih tur theuh hlen thin turin mipuite a chah.
Inkhawmah hian bialtu MLA Jeje Lalpekhlua leh Bawrhsap K Vanlalruati te pawhin thu an sawi.
Lal Vandula Lungdawh leh Lalnu Ropuiliani thlan hi Denlung branch YMA leh Denlung khawtlang mipui sak niin Mizo mistiri vek hman a ni a. A sakna tur hi Lalthuama Sailo (Ropuiliani tuchhuan thumna, Hrangphunga thlah, Aithur lal Vanhnuaithanga Sailo fapa) thawh niin Rs nuai 5 vel sen a ni.