Trinamool Congress Meghalaya unit chuan an vice president an chân a, Zenith M Sangma hian Nilaini khan Congress party a zawm leh a. Amah hi chief minister hlui, Mukul Sangma nen unau an ni.
Sangma unau hian kum 2021 khan MLA eng emaw zat nen Congress chhuahsanin Trinamool hi an zawm a. Tuna Zenith Sangma a kir leh hi kum thar autonomous district council inthlan an hmachhawn mai tur karah a ni a, a chhuahsan tak party hian chakna an nei tawk lo niin a ngai nia sawi a ni.
Thawhlehni khan Sangma hian a bân thu a puang a, thutlukna siam harsa tak a nih thu leh a inngaihtuah nasat thu a sawi.
“Thutlukna awlsam tak a ni lo va, Trinamool Congress-a ka awm lai hian tawnhriat hlu tak tak, zirlai leh hriat reng tur ka nei a. Ka thawhpui, party worker leh min duhsaktute hi ka ringtawk zel ang a, ka thlawpin ka thian thate an ni zui zel ang,” a ti.
“Nun hian hun leh remchang tha a tawng thin a. Vawiin pawh hian kalsana bung thar kai hun niin ka hria a, pakhata ka insawn hi ka mi mal hmathlir leh mipuite duh ka tihhlawhtlinsak theihna tur kawng awlsam zawk niin ka ngai a ni,” a ti bawk.
A u, Mukul Sangma-a’n zuiin Congress a zawm ve dawn em tih zawhna chu Zenith-a hian Mukul-a hi ‘hruaitu tha leh fing, hriatna zau leh tawnhriat tam tak nei tawh’ nia sawiin politic-a thutlukna siam turin amahin a tha ber tur a hria niin a sawi.