Hurricane Melissa chuan Haiti leh Jamaica nuaia mi 26 vel thihna a thlen hnuah Caribbean thliarkar Cuba a lut zui.
Thi zinga mi 25 hi Haiti chhim lama Petit-Goave khuaa Nilainia lui lian thutin a langte an ni a, tui lian leh in chim a nasa hle bawk.
Mayor Jean Bertrand Subreme chuan in chim karah tang pawh an la awm tih a sawi.
Thi dang hi Jamaica-ah niin thliarkar khawthlang lama thing tluin naute a delh hlum a ni tih State Minister Abka Fitz-Henley chuan a sawi.
Melissa hi Jamaica nuaitu Atlantic hurricane na ber niin Thawhlehni khan a nuai tih US National Hurricane Center chuan a sawi.
Nilainiah Cuba kaltlangin Category 5 atangin Category 2-ah a tlahniam tawh thung a. Nilaini zan (India-a Ningani chawhma) khan Bahamas a lut leh bawk.
Jamaican Prime Minister Andrew Holness chuan an rama Melissa thawhna hmunte chu ‘chhiatna thlenna hmun’ tiin a sawi.
Hurricane hian in chung a hawk a, power line chakin thing a tlu nasa hle a, mi maktaduai 2.8 velin electricity an neih loh phah.
Melissa hian Jamaica paltlang nan darkar khat chuang hun a hmang a, thli a nasa hle a, Cuba a lut zui.
Cuba khawchhak lamah chuan mi 7,35,000 vel inhumhimna hmunah awmin hurricane hi Granma, Santiago de Cuba, Guantanamo, Holguin leh Las Tunas province-ah thawk tura sawi lawk a ni.
Granma Governor Yanetsy Terry Gutierrez chuan an khawpui, Jiguani telin province hmun thenkhat chu ‘tui hnuaiah’ a awm tih a sawi.
Thuneitute chuan in chim, tlangram kawng ping leh in chung hawk a tam hle tih an sawi.
Jamaican sorkar chuan Nilaini chawhma (India-a zan)-ah khan inralrinna a titawp rih a; mahse, thil chhiate chhut fel tur chuan hun a duh dawn tih an sawi.
Chhim leh chhimthlang lamah chuan inbiakpawhna a chhe vek’ niin Jamaica-a Office of Disaster Preparedness & Emergency Management Director General Richard Thompson chuan a sawi.
Disaster Risk Management Council Deputy Chairman Desmond McKenzie chuan damdawi in pali a chhia a, pakhatin power a nei lo bawk a, damlo 75 thiar chhuah an ni tih a sawi.
Chhim lama Clarendon leh chhimchhaka Saint Elizabeth-ah chhiatna a thleng nasa zual a. Santa Cruz khua chu lei minin dangin sikul chung, miin tawm nana an hman chu thliin a la bawk.
Prime Minister Holness-a chuan sorkarin rang takin chhawmdawl leh chhanchhuah hna a thawk nghal tih a sawi.
Melissa hian Jamaica a luh tak tak hma hian Jamaica-ah mi pathum, Haiti-ah mi pathum leh Dominican Republic-ah mi pakhat thihna a thlen tawh bawk.