ZPM Legislature party Leader Lalduhoma chuan Dampa bialin ruling bial nih theihna hun tha an neih chu mipui duhthlanaah a innghat tih a sawi.
Chief Minister chuan Lalduhoma’n Inrinni khan Guwahati atanga Lengpui Airport a tum hnuah Dampa bial a pan nghal a, Marpara North Community Hall-a vantlang inkhawm buatsaihah thu a sawi a. Kum 2023 MLA inthlanpuiah khan tunge sorkar dawn a hriat lo va, MNF a sorkar dawn emaw tiin MNF an thlang tling a, tunah erawh ZPM bak duhthlan tur a awm tawh lo tih sawiin, Dampa bial by-election chu ZPM sorkar hnua inthlang an nih dawn tawh avangin Dampa bialin ruling bial nih theihna hun tha an neih chu an chhawr tangkai ngei a rin thu leh an duhthlanna liau liau a nih thu a sawi.
ZPM Legislature party leader chuan Bangladesh hian Dampa bial Silsuri bul thleng kawng an sial tawh a, Mizoram lamah chuan sorkar hmasate hmalakna a awm lo tih a sawi a. Tunah hian Pukzing – Silsuri leh Silsury – Marpara inkarah kawngpui tha an nei ve thuai dawn a. Silchar kawng chauh ni lo vin, Dampa bial chu Mizoram chak lakna kawngpui pawimawh, insumdawn tawnna hmun a ni thuai dawn tih a sawi.
Lalduhoma chuan Dampa bial chu kuhva, thialret (rubber) leh hmuhphiah chinna hmunpui a nih avangin sorkarin a ngaihsak zel dawn tih a sawi a, warehouse leh godown te chu constituency bial pakhata siam tamna ber a nih thu a sawi a. India leh state hian inlaichina tha an duh a, India leh state hian India khua leh tui diktak Chakma te an en hrang dawn lo tih a sawi bawk.
Vantlang inkhawmah hian ZPM candidate Vanlalsailova leh ZPM Gen. Hqrs. Vice President C. Lalnunnem a, CM adviser pahnih, Lalmuanpuia Punte leh TBC Lalvenchhunga bakah MLA T. Lalhlimpuia ten an tawiawm a ni.