Dampa bial by-election a MNF Candidate, Dr. R. Lalthangliana’n Pathian leh mipui zara a tlin chuan khaw tina hmasawnna hnathawh dan tur ngaihtuah turin village level plan a din tur thu a sawi.
Inrinnia Saithah, Lallen, Kawnmawi leh Chhippui a tlawhnaah Dr. R Lalthangliana chuan, “Dampa bial khaw tin hian mamawh hrang theuh an nei a, a inang lo hlawm hle a. Pathian leh mipui zara thlan tlin a nih chuan VC, political party hrang hrang leh NGO hrang hrangte nen inrawnkhawmin an la hriat ngai loh, ‘Village Level Plan’ din a ni dawn,” tiin, khaw hrang hrangin an khaw mamawh bik an neih ang zela an harsatna sutkianna turin hmalak a tum tih a sawi.
Dr. R. Lalthangliana chuan, ZPM sorkarah ruling MLA leh opposition MLA-te an danglam bik vakna a hriat loh thu a sawi a. Dampa bialah hian ZPM hian MLA neih belh mah se, sorkar chu a ngai rengin a kal dawn a, amah an thlan tlin chuan an bial tan danglamna nasa tak a thlen ngei a inbeisei tih sawiin, an inchhir a rin loh thu a sawi bawk.