Kan kawtkai maiah rel a rawn lut tawh a, nitin hnamdang min chimtu kan mikhual ta ruih ruih mai. A lawmawm zawng leh hmasawnna zawnga ngaihtuah chuan a lawmawmin, a tha hle a, mahse inhungbingna nei hnam leh ram kan ni tih erawh hrereng ang u.
Mizo Zirlai Pawl (MZP) chuan hmanni deuh khan Sairang rel chawlhhmun zu tlawhin, ILP kenkawh that loh a nihzia leh hnamdang phalna neia luh ngaite umzui an nih lohzia an rawn hmu haw nasa hle a, thuneitute hmalakna a beithamzia an sawi nasa hle bawk.
Hetiang a nih avang hian MZP hruaitute chuan home minister chu a pisaah hmuin, ILP dan siamthat a tulna leh hmalakna hmasa tura tul nia an hriatte an thlen a, heng zingah hian traveller access, administrative efficiency, digitalization, enforcement, penalty leh sponsor mawhphurhna bakah centralised online ILP portal siam a ngaih thute an thlen a, heng chin ringawt pawh hi sorkar hian a ngai pawimawh tak taka hmalakna hmasaa a neih a nih ngat chuan ramchhung hian kan hlawkpuiin, kan thatpui nghal dawn.
Kan zirlai pawlte hi ram leh hnam humhalh kawngah hi chuan tunhma atangin hmala thatu leh hmala nasa an ni reng a, mi thenkhatin tai pawng pawngin sel thin mah se, kan ram leh hnam tan hi chuan belh tlak an la ni reng bawk. Kan hnam hian humtu a la mamawh reng a, theihtawpa humhalh ngai a la ni reng bawk. Chuvang chuan kan inhungbingnate, kan hnam nunzemawi takte hi humhalh a, humtu ni zel turin tan la thar zel ila, hemi kawnga theihtawp chhuahtu pawl apiang chu i thawhpui zel bawk ang u.