Aizawl: November 2, 2025 (Pathianni) hi Khawvel Sunday School Ni a ni a. Kumin Khawvel Sunday School Ni-ah hian Mizoram Presbyterian Kohhran chuan hemi pual hian inkhawm an buatsaih.
He ni puala inkhawmah puitling lamah Upa B. Lalhmunliana ziah ‘Fanau Enkawl’ an zir a. Intermediate Department – Senior Department-in Upa Lalrammawia Ngente ziak ‘Tleirawl te leh Social Media’ an zir a, Beginner Department – Junior department-in Lalpianthangi Hrahsel ziak ‘Thu Awihna’ an zir a ni.
Sunday School hi kum 1780-ah England ram, Gloucester khuaa Robert Raikes-a din a ni a. Hemi hma pawh hian mi thahnemngai eng emaw zatin anmahni huam chhungah mumal deuh takin an kalpui tawh a. Kalphung fel zawka a indin chhuahna leh a darh zau takna chu Robert Raikes-a hmalakna a ni.
Thil siamna hmuna thawk naupangte ziak leh chhiar thiam lo, inkhawm ngai miah lote chu hruai khawmin Meredith-i inah, ama sum senga zirtirtu ruaiin a zirtir a. Vawi khat class lakah zirtirtute hi shiling khat a hlawhtir nia sawi a ni. Kum 1805 atangin John Wesley-a hma laknain hlawh neia zirtirtu rawih chu tihtawp a ni ta a ni.
Dodalna nasa tak hnuaia bul tan ni mah se, Sunday School hi mi chanhaiten zirna an dawn theihna hmasa ber a nih avang leh Sunday School kaite nunah danglamna nasa tak an hmuh avangin a darh zau zel a. A tira hmusit taka elsentute ngei chuan, “Robert Raikes-a hian Gloucester khuaa sihal rualte chu beramnoah a chhuah vek a ni,” an ti hial a. Pawi khawihna tlahniama jail tang an tlem tak em avangin Gloucester khua leh a chheh vela dan lekkawhtu leh thubuai remtu inzawm khawmte chuan kum 1805-ah Robert Raikes-a hnenah inthurualin lawmthu sawina lehkha an thawn hial a ni.
India ramah July ni 9, 1803 atangin missionary ropui William Carey-a leh a thiante (Serampore Trio) hma laknain Sunday School neih tan a ni a. Mizoramah pawh Zosap Rev. D.E. Jones-a (Zosaphluia) hma laknain February ni 20, 1898 atangin mei mit lovin an nei zui ve ta a ni.
Oct. ni 22, 2025 (Nilaini) a MSSU Committee Report-a a lan danin, tunah hian MSSU hnuaiah Sunday School 1,035, Hotu 6,031, Zirtirtu 55,480 leh Zirtu 4,27,261 awmin, hming ziak zawng zawng hi 4,88,772 an awm mek a ni.