Aizawl: Mizoram University Zoology department-a head, Prof. H.T. Lalremsanga leh a research scholar, Dr. Ht. Decemson te chuan ram laitel chi thar, ‘Laiteldulsen’ an hmu chhuak.
Prof. H.T. Lalremsanga leh a research scholar te hian MV Lomonosov Moscow State University-a Russian scientist leh Germany-a Max Planck University-a an thawhpuite nen Himalayan tlangdunga hmun pakhat, Chopta, Uttarakhand atangin ram laitel (skink) chi khat, DNA leh pianphungte Developmental Biology & Herpetology Laboratory, Zoology dept., MZU-a an zirchianna atangin ram laitel chi thar an hmuchhuak a, a hmingah Ablepharus flammeus tiin an vuah.
Hemi chungchang hi German scientific journal, Salamandra-in October 30, 2025 khan a tichhuak a ni.
An laitel species thar hmuhchhuah chungchangah hian Prof.H.T. Lalremsanga chuan, “A-blepharus-te hi laitel chi khat niin an mit hi rul mit anga mit vun nei lo leh mit khap ve thei lo an nih avangin ‘Snake-eyed skinks’ tia hriat lar an ni a. Khawvel pum huapah hian Europe chhim chhak atanga Asia chhak lamahte chauh awmin species 19 hmuhchhuah tawh niin, India ramah chuan tuna hmuhchhuah thar nen hian species pasarih hriat an ni tawh a. Tuna kan hmuhchhuah thar hi tlang sang leh chhengchhe tak tak metre 2,500 atanga metre 3,300 chung lam ramhnuai atangin a ni a, heng laitel hi a pa-ah chuan an nghawng leh dul vel rawng hian meialh sen rawng a an em avangin a scientific name-ah A-blepharus flammeous, English-in Fire-bellied Ground Skink, a Mizo hmingah Laiteldulsen tiin kan vuah a. He laitel species thar hmuhchhuah hi an biology hriat mumal a la awm lo va, IUCN criteria hnuaiah Data Deficient (DD) a dah a ni,” a ti.