Mexico hmarthlang, Sonora state-a bazarpuia thil puak avangin naupang telin mi 23 vel an thi a, mi 11 velin hliam an tuar bawk tih thuneituten an sawi.
He thil hi Inrinnia Hermosillo khawpuia Waldo’s dawra thleng a ni.
Sonora-a prosecutor’s office chuan ‘hriat theih chinah thil thleng palh nia hriat a ni rih phawt a, dawr chhunga transformer chu uluk zawka chhui mek a ni’ tih a sawi.
Tual chhunga ventlang himna lam buaipuite pawhin ‘mi beihna’ emaw, civil mite laka ‘tharum thawhna’ lam emaw a nih a rinawm loh thu an sawi bawk.
Sonora Governor Alfonso Durazo chuan video-a thuchhuah a siamah a tuartu tam tak chu ‘naupang’ an nih thu leh dam chhuakte chu Hermosillo-a damdawi in hrang hrangah enkawl an nih thu a sawi.
“Zau tak leh langtlang taka chhui turin thupek ka siam a, a chhan chhui chhuaka a mawhphurtute pawh hai lang vek tura tih an ni,” tiin Durazo chuan a sawi.
“Tute mahin he hrehawmna hi a malin an tuar lo vang. A thlen tirh atanga emergency, venhimna leh damdawi thiamten inpe tak leh an tih tur tak tia an lo hmachhawnnaah a lawmawm ka ti a, nunna tam tak hum nana an beihna a lawmawm hle a ni,” tiin governor chuan a sawi bawk.
Mexican President Claudia Sheinbaum-i pawhin a tuartu chhungkuate a tawrhpui tak zet tih X-ah a tar lang ve bawk.
“Sonora Governor Alfonso Durazo pawh ka be tawh a, a mamawh ang puihna pawh pek zel a ni dawn a. Interior Secretary Rosa Icela Rodriguez pawh a tuartu chhungkua leh hliam tuarte pui tur support team tir turin ka ti nghal bawk,” a ti.
Tual chhung chaanchinbuten thlalak an tihchhuahah chuan bazarpui dawr hma lam hi a kang chhe nasa hle a, tukverhte pawh a uai hnenghnuang bawk.
El Universal chanchinbu chuan an rama Inrinni chawhnu dar 02:00 (India-a Pathianni zing dar 01:30) pelh hnu deuhva thleng a nih thu leh a bul hnaia dawr dangte chu meiin a kan kai mai hlauh vangin an inkhar nghal hlawm tih a tar lang.