- K. Hmingthankaia
MNF party- in ni 29.10.2025-a FCAA duhlohna band an siam kha mipuiin zaidam taka kan zawm tha lutuk kha band siam chhan hlawhtlinna nge hlawhchhamna zawk ni ta ang le?
Inrinni, chawlhni leh sawrkar holiday-ah pawh kan ram khawilai mah, a bik takin khawpui phei chu a reh tak tak ngai chuang lova, tumahin hna kan thulh phah lova, kawng hrang hranga kan nitin duhamna chu a ngai reng tho thin. Chuvangin, Aizawl pumpuia motor ri chuah chuah leh mipui ri luih luih awm loh ni hi nikhat pawh kan tawng ngai ta lo a ni.
Mahse, tuten emaw eng vang pawhin band an han siam tawh hi chuan, band siamtute leh an band siam chhan kan thlawp vang pawh ni chuang lovin, tute mah hian chet chhuah bik tum lovin, lungawi tak leh rilru hahdam tak hian, rilru leh taksa tihahdam nan tiin inah kan awm hle hle mai thin a nih hi.
Tun tum MNF band siam phei kha chu kan rama band siam tawh zawng zawngah a la hlawhtling berin a la hahdam thlak ber niin kei chuan ka hria. Ka fanu phei chuan, ” Awi, vawiin hi a nuam lutuk, a reh hahdam raih maia, hmanlai kan veng awmdante kha a ang leh ka ti a, ka lung a leng, tute emaw hian band siam zeuh zeuh chi a nih hi” a ti hial a ni.
A ni taka, he MNF band siam ni hian tute mahin party ruihchilh vanga inrunluihna emaw, tuten emaw kei ka ni tih vanga band siamtute huat vang leh tham loh leh palzut tum vanga nawr buai leh tihbuai tum an awm hek lo. Sawrkar lahin, party indona leh initsikna tih hre reng mah se, a thuneihna hmanga a hnathawk leh mipuite che chhuak turin a nawr lui duh der si lova. A leh hahdam thlak ta phian a nih kha.
Mipui leh sawrkar chuan tih tul leh tih tum pawimawimawh tak tak chu kan nei ngei ang. Mahse, innawr buai vel ngai lovin, fing takin MNF band siam chu kan zawmpui dial mai a nih kha. Sawrkar leh mipui kha kan fing changkang ka ti.
Mahse, khati taka mipuiin band kan zawm tha lutuk kha band siamtute tan khan a ngaihthatthlak angem le? An band siam chhan ber leh an tum ber, sawrkar leh mipui tihmangana, harsatna tam tak siama, rik luih luih leh innawr buai vel vak vaka, intithunei taka chet rawva vel an tum chu a thleng ta hauh si lova. Mipui rilru chawhphura, tihzauthauva, sawrkar lai ZPM huatna leh hlauhna leh demna nasa tak mipui rilrua chawhthawh an tum pawh chu eng teh vak mah a nih hmel mang ta chuang si lova. Ngun taka chhuttu tan chuan khati taka band cool siamtu nih pawh kha a zahthlak zawk mai thei. Chuvang pawh chu a ni mahna, tlai dar 4 thleng tih tum khan chhun dar 1-a an tihtawp tak ni. Engpawhnise, engmah mimal, pawl leh sawrkar leh a ram ang pawha buaina leh inhuatna awm lova band siam tlingtlak kha a tha hrim hrim e.
Mipuite hian intihbuai vel ai chuan hahdam taka chawlhhahdam kan thlan zawk avanga khatiang thil kha thleng a ni a. An band siam chhan FCAA chungchang hi chu mipui nawlpui hi chuan kan ngaipawimawh lutuk lova, tun atana lo hriat thiam leh lo buai chiam theih ni pawhin kan hre meuh lo niin a lang. Oppososition-ten sawrkar lai beih nana remchang hmu intia, mipui rilru chawh thova, tihchi-ai chiam an tum ang erawh chuan mipui tam zawk hi chu kan chi-ai vak lo niin a lang. Mipui hi kan a vak tawh lova, India sawrkar thang chak tak mek leh, khawvel hmuha ropui leh lan mawi a tum mek karah hian, Indian politician fing tak tak ho hian dan an siam chu ram pum tana tha tur nia an hriat a ni ngei anga, keini Mizote chauh tinzawna, ama ram ngeia awm keini Mizote hi chuti taka min huata, min tihchhiat vek leh min diriam vak a tum hi kan ring chiah lo a ni. Chubakah, khawvel ram dangte laka India thil tum ril tak leh, hmalam hun thui tak a thlir chu kan hriat thiam pui phak loh lutuk avang hian, tuna FCAA lo hlauh chiamna thinlung hi kan nei pha tehchiam lo a ni ang.
Bakah, party inbeihna a ni tih hi mi pangngai chuan an hrethiam niin a lang bawk. A boruak lum tur ang leh hawt sosantir an tum ang chuan a hawt thei tak tak lo a nih hi. Remchang hmu intia buai em emte chu a ngaite bawk, lalna atchilh leh inchuh party mite leh party ruihchilh an worker te vek tho an nih hi. Thli thlir thiam mifing leh mi thiam an tih, helam rawn sawi thintute pawh hi party tan lam nei vek vanga sawi niin an langa. An thu sawi rawn tarlang thintute atang pawh hian a hriat theih mai a ni.
Chuvangin, ni 29.October 2025-a MNF party-in FCAA dodalna band an siam kha mipuin zawmpui tha viau angin lang mah ila, an band siam chhana an puh, FCAA erawh kha chu, party leh lalna ruihchilh ve lo mipui pangngai tam zawk rilruah hi chuan a tla na vak lo niin kei chuan ka hria.
Khati tak khan mipuiin band kan thlawp that chhan kha, band siamtute leh an band siam chhan kan thlawp vang ni chuang kher lovin, mawl taka intihbuai leh atthlak taka inhuat te kan duh loh vang mai zawk a ni tih hriaiin, tun chinah erawh chuan hnampum nghawng na tak tur, lang tlang tak leh chiang taka mi te ber pawhin kan hriat theih nghal leh hmuh theih nghal thil, issue lian tling lovah chuan, a hman hman hian mahni hmasial vangin tumahin band erawh chu rawn siam fo tawh suh se.