Mizoram Legislative Assembly Dy. Speaker Lalfamkima, Kolasib bialtu MLA ni bawk kaihhruaiin Inrinni khan an district paltlangtu National Highway (NH-306/06) siam that hna thawh dan tur chungchangah NHIDCL hotute leh an hnuaia contractor-te nen sawi hovin an thukhawm.
Thutkhawmnaah hian Lalfamkima chuan fur ruahtui a zawh tawh avangin hna thawh tan theih a ni tawh tih a sawi a. NHIDCL leh contractor-te an inbuatsaih dan a zawt bawk.
NHIDCL hotute chuan an hmalakna hrang hrang sawiin Buichali atanga Khamrang kawng chhe zual lai siam an zawh hnaih tawh thu leh Kawnpui leh Khamrang khawih chhunzawm mek a nih thu an sawi a. Kolasib atanga Kawnpui inkar siam that leh tur niin tunah hian side drain siam hna kalpui mek a nih thu an sawi.
Black topping hna thawh tur chungchangah contractor ten repairing hna an tih hmasak phawt tur thu sawiin, Kolasib leh Bilkhawthlir inkar black topping hi November thla chawhnu lam atanga tan tum a nih thu an sawi a. Amaherawhchu, hna thawh nan a mamawh hot mix plant chu Mizoramah a lo la thlen loh thu an sawi bawk.
Tunah hian kawngpui khu lutuk tiziaawm turin tui an phuh tan a, ni khatah vawi hnih phuh tura tih ni mah se tui harsat avangin an tihlawhtling thei rih lo tih an sawi bawk.
He kawngpui siam hna hi Kolasib district chhungah contractor pathumin an thawk mek a. Vairengte atanga Bilkhawthlir leh Kolasib-Kawnpui inkar chu Balaji Company-in an khawih a; Bilkhawthlir-Kolasib leh Kawnpui-Khamrang inkar chu J. Infratech-in an khawih laiin, Khamrang atanga Buichali chu BR Goyal Infrastructure ten an enkawl thung.
Thutkhawmah hian NHIDCL hotute leh contractor-te chuan harsatna an tawhte sawiin Kolasib khaw chhung, Rengtekawn thlengin kawngpui area nek an tam a, heng hian side drain a hnawh avangin kawngpuiah tuihawk a luang thin a, kawng a chhe hma niin an sawi a; hemi chungchangah hmalakpui turin dy. speaker chu an ngen a. Hemi bawhzui hian district magistrate kaihhruaiin police, revenue, Sub-Hqrs YMA, NHIDCL leh contractor-te telin chawlhkar tharah hian enfiah nise an ti.
Hei bakah Kolasib khawpui chhung, Diakkawn leh hmun eng emaw zat chu bialtu MLA ruahmanna angin Pavement Quality Concrete (PQC)-a siam tum a nih thu leh hemi atan hian NHIDCL Headquarter-ah proposal siam tum a nih thu an sawi tel bawk.