Assam-a Cachar district police chuan damdawi thila inbumna tam lutuk an beih meknaah ni hnih liam ta chhungin doctor anga lemchang nia puh mi pahnih an man leh a, thla thum chhunga mi 17 an manna a ni tawh.
August thla atang khan Cachar district ringawtah hian doctor lemchang man an tam tawh hle a, thuneituten hetianga mi buma mi pawisa chhuhsak thin an awm hi tihtawp tumin hma an la mek zel.
Tun hnaia an mante hi Supal Roy (41), Chotojalenga Part II-a cheng leh Indrajit Roy (39), Tatpara, Jalpaiguri, West Bengal-a chengte an ni.
Police hian Supal Roy-a hi kut ngeiin an man a, Rosekandy tea estate-a a damdawi dawra damlo a lo en lai tak an nangching a, an man zui a ni.
Indrajit Roy-a hi Maa Ayurved, E&D Colony, Tarapur-a an man a ni a, visiting doctor anga insawiin damdawi a chawh thin a. Police chuan eng damdawi lehkha mah a nei lo niin an sawi.
“Thla hnih liam ta chhung khan doctor anga awm lakah hian beihpui kan thlak mek zel a, Cachar-a hmun hrang hrang atangin hetiang mi hi 17 kan man tawh a. Ni hnih liam ta lekah pawh pahnih kan man leh ta a ni,” tiin police hotuin a sawi.
Mipui pawhin an mi rinhlelh leh lemchang nia an hriatte an hriattir zung zung theih nan police hian thlenna tur phone number pawh an siam a. An beihpui thlak hi district chhunga lemchang an awm chhung chuan an kalpui zel dawn tih an sawi.