Kar kalta inrinni, November ni 1, 2025 khan Mizoram chief minister Lalduhawma chuan Dampa bial MLA bye-election turah inthlan campaign rusum thlakin thu tiam tam tak a nei a. Dampa bialah ZPM candidate Vanlalsailova an thlan tlin chuan Silsuri leh Bangladesh inrinna laiah border trade siamin Dampa bial chu sumdawnna hmunpuiah kan siam ang a ti hmiah mai a. Dampa bial tan chuan hei baka thu lawmawm leh duhthusam a awm lovang tih hial tur a ni.
Amaherawhchu, hetianga chief minister in huai taka thu a sawi lai hian a nihna tak chhuichian chuan kan CM thusawi hi boruaka tham ral mai thei a ni tih leh siam theih a nih pawh tun atanga kum sawmah hian tih theih a ni ang em tih vel a ni. Bangladesh hi India ram a ni lova, ram hrang a nih avangin duh duha sumdawnna leh thildangah pawh intlawhpawh zung zung theih a ni lova. Sumdawnna tura ruahmanna lam phei chu state thuneihna piah lam, central-in a khuahkhirh beh tlat a ni. Tin, inkalpawhna kawng mumal a la awm lo bawk. Sumdawnna a inkalpawh tur chuan central phalna lak a ngaih bakah central in insumdawntawnna tur bungrua pawh a thliar fel vek a ngai bawk. A karah hian tih tur tam lutuk a awm a, Bangladesh leh India a inbiak thiam a ngai hmasa leh bawk.
India leh Bangladesh hi kum 2024 a an prime minister ni mek Sheik Hasina an paihthlak atang khan boruak a chhe hle a. Muslim ram, firfiak taka sakhuana kalpui tum an tum avanga India mite tiduhdah mek an ni. Hindu sakhaw bia tam tak chu an rawn tlanchhe mek a, tun kum tawp lam hian India sawrkar chuan helai ramri bawrah hian indo nunchan zir a, indo thut pawha englai pawha inpeih turin a sipaite a inrin tirin boruak a tha lo hle a, sumdawn tawnna lam chu beisei a bo rih hle.
Hetiang a nih laia kan chief minister in mipui vote lak tumna a thutiam a nei leh ta ut ut mai hi hun kal tawh atanga kan politician-te hmalak thin dan, a tak ram thleng leh si lova mipui beiseina ti thlawntu mai ni thin chu a ni. Tihhlawhtlin theih loh tur thu tiam zung zung avang hian kan ramah mipui beiseina chu beiseina beidawngah a chang a, chu chuan kan politician-te ah mipui rinna a ti bo zo a. A bik takin thalaiten ram hruaitute an hmuh khawloh phah a, dawt sawi hmangah an ngai hial ta a nih hi. Ram hruaitute ber mipui ten dawt sawi hmanga an ngaih tawhna ram hi ram dingchhuak leh mipuite hmasawnna ram an ni ngai lo.
Thusawi mai hi a har lova, a tak ram thlen tir hi thil namai lo a ni. Chuvangin, vawiin nia beidawnna mipui thinlunga intuh nghet tawh tizual tur hian kan hotute hian tawngpawng tawng mai mai loh an chin a ngai a ni. An tawng duh luatah a vuak let a na a, a tawpah mipui thinrim sosang hi kan ramah a thleng ang tih a hlauhawm takzet tawh a ni.