Kylian Mbappe chu 2024-25 chhunga goal a thun hnem avangin European Golden Boot an hlan.
French forward hian season hmasa khan Real Madrid a zawm hnua Spain-a a season hmasa berah La Liga goal 31 a thun nghal a. European Sports Media chuan mi mal chawimawina, Europea Golden Boot an hlan a, a dawn hmasak ber a ni.
He mi puala Bernabeu-a hun an buatsaihah Mbappe chuan, “Golden Boot ka dawng thei hi ka tan chuan thil lawmawm tak a ni,” a ti a. He hunah hian coach Xabi Alonso, Real Madrid squad leh president Florentino Perez te an tel.
“Ka tan chuan hei hi thil pawimawh em em a ni a, he chawimawina ka dawn hmasak ber a ni a. Forward ka nihnaah ka tan a hlu em em a ni,” a ti.
European Golden Boot hi Europe khawmualpuia football league huanga season khat chhunga goal thun hnem ber hnenah an hlan thin a. Point pek dan hi league hrang hrangah a inang lo va, league hlut dan azirin point an ken tel zat pawh a danglam a ni.
League goal 31 a thun avangin Mbappe chuan point 62 a hmu a. A hnuai chiahah Viktor Gyokeres awmin Sporting CP tana a goal thun vangin point 58.5 a hmu a, Liverpool thiampuipa, Mohamed Salah chuan point 58 a hmu a, pathumna a ni.
Harry Kane chuan he chawimawina hi 2023-24 khan a dawng a, Erling Haaland pawhin 2022-23-ah dawngin he mi hma season-ah Robert Lewandowski chuan a dawng bawk a ni.
Chawimawina a dawn chungchangah Mbappe chuan a khelhpuite a fak hle a, an tanrualna avanga hetiang dinhmuna ding thei a nih thu a sawi a. Coach Alonso kaihhruaina hnuaiah 2025-26 season bul pawh an tan tha a, inelna hrang hranga vawi 13 an khelhah vawi 12 zet an chak thei.
“Kan inhlawm khawm fuh hle a, kan thawhhona leh kan tanrualna a tha a. Kuminah lawmman pawimawh tak tak kan dawng ngei dawn a, chutianga lawmman dawn theih tluka pawimawh a awm lo. Heti lai hmunah hian kum tam tak ka awm theih ka beisei a, lawmman pawh tam tak kan dawn theih ka ring tlat a ni,” a ti.
Real Madrid chu LaLiga-ah hmahruaitu an ni mek a, kar hmasaah khan El Clasico-ah an hmelma Barcelona an hneh.
“Kan thawhhova hma kan sawn belh zel ka beisei a, team aia pawimawh hi a awm lo. Ka khelhpuite hi awm lo se lawmman dawn ngaihna a awm lo tih ka hria. Club hnenah lawmthu ka sawi a, khelmual chhung leh pawna min puibawm reng thin doctor leh staff chungah lawmthu ka sawi bawk a. Kum tharah pawh he chawimawina hi ka dawn leh ngei ka beisei a, bul ka tan tha bawk a, beiseina ka nei sang hle,” a ti.
Perez chuan, “Kan team-in innghahna tur Kylian anga player kan nei hi lawmawm ka ti a, he club ropuina tilang theitu pawimawh a ni. Season hmasa khan UEFA Super Cup leh Intercontinental Cup min lakpui a, league-ah vawi 34 khelhah goal 31 a thun a. Inelna hrang hrangah phei chuan goal 44 a thun a. Season kal mekah goal 16 a thun tling tawh a, LaLiga leh Champions League-ah goal thun hnem ber a ni mek a, a vanglaia season tha ber tur a hmang mek a. Golden Shoe a dawn hmasak ber a ni a, thil dawn harsa tak mai niin, kan player pathumin an lo dawng tawh a, Hugo Sanchez, Cristiano Ronaldo leh Ronaldo Nazario te huangah a lut ve thei dawn a ni,” a ti.