Aizawl: Transport department chuan Sairang rel station atanga Guwahati pan tur bik tan a hun taka rel station an thlen theih nan MST bus chhuah hun darkar khatin an sawn hma.
Thuchhuah an siamah Transport Department chuan September 13, 2025-a Sairang rel station hawn chu a panna leh veivahna chungchangah khualzinten harsatna an tawh lohna turin September 29 atangin MST bus service-tir a ni a, Delhi, Kolkata leh Guwahati atanga khualzin phur hian MST bus vawi 79 kal tawhin passenger 3,196 phurh an ni tawh tih an sawi a; heng an passenger phurhte hi a hun takah, tlai lovin phurh thlen vek an nih hian Inrinni liam taa Guwahati kal tur passenger-te bus-in a hun taka a thlenpui thei lo chu pawi an tih thu an sawi.
MST bus ticket chu ni sarih hma lam atangin advance booking tih theih a ni a. Chutiang a nih avang chuan a hunbi dik tak a thlen hma chuan an chhuak ngai lo va. Hemi ni pawh hian Transport Complex, Chaltlang atangin tlai dar 5-ah chhuakin zan dar 7-a rel chhuak a nang hman ta lo tih sawiin, “Hei hi a chhan ber nia lang chu traffic jam nasa lutuk vang a ni,” an ti.
He thil thleng hi department chuan pawi a tih thu sawiin an passenger phurhte chungah pawh ngaihdam an dil a. Hemi chungchang ngaihtuah hian department hotute pawh an inhmukhawm nghal tih an sawi a. Tun hnuah bus a thlen tlai tawh lohna turin Guwahati kal tur bik tan transport complex atanga bus chhuah hun chu darkar khata sawn hma a nih thu sawiin, tlai dar 5-a chhuak thin chu tlai dar 4-ah a chhuak tawh dawn a ni.