Kuminah sawhthing man la pek chhuah loh Rs vbc 20 vel a la awm.
Mizoram Agricultural Marketing Board chu an chairman, Chief Minister Lalduhoma kaihhruaiin CM Conference Hall-ah thukhawmin kumina thlai thar leite an thlir let a. Kuminah sawhthing quintal 3,38,354 lei a nih thu leh a man pek chhuah tawh hi Rs. vbc 118.89 niin la pek chhuah loh Rs. vbc 20 vel a la awm tih Thawhtannia thutkhawmah tar lan a ni.
Sorkarin sawhthing a lei zingah LPK trip sarih chiah hralh ral lohvin a awm a. Hetianga a awm chhan hi a chhe tur ven nana thliar (grading) a ngaih vang a ni a. Hei pawh hi lei tha siam nana lei diltu an awm mek a. A dang zawng chu mumal taka tihral vek a nih thu sawi a ni.
Thutkhawmah hian sawhthing lei leh hralh thua thil fel lo a awm leh awm loh chhuitu investigation team-ten Champhai district an chhuichianna report an pe a. Thil dik lo an hmuhchhuahte hi sorkarin a taka sum a la pekchhuah loh te an ni a. Hetiang harsatna hi a awm tawh loh nan ruahmanna an siam a ni.
Kumin sawhthing lei leh hralhna bikah hian sorkar laipui Market Intervention Scheme atangin Rs. vbc 9 vel hmuh let beisei a ni bawk.
Kum thar atana inbuatsaihna bakah hian NITI Aayog-in sawhthing chungchang sawihona a buatsaih tura tel tur an ruat a, Buyer Seller – Meet 2025 neih dan tur te, MAMB thuam chak dan tur leh thil dangte an sawi bawk.
Thutkhawmah hian Agriculture Minister PC Vanlalruata, Horticulture Minister C. Lalsawivunga, LRS&WC Minister Lalthansanga, Adviser to CM (Handholding) Dr. KC Lalmalsawmzauva leh member-te an tel.