Aizawl: Health Minister Lalrinpuii chuan ram tana thil tha nia an hriatah chuan huaisen takin an kal zel dawn tih a sawi.
ZPM party-in an party pisa-a chhung inkhawm Thawhtannia an neiha thusawitu, health minister chuan Pathian leh mipuite zarah kalphung thar sorkar chu kum hnih a tling ve tep a, sorkar hmasa lamah khan damdawi leh ruihhlo a hluarin, khawtlang mipui an rum a. Hausa thutte avangin in hmun lo ram man thlengin a sang chho va, ZPM sorkar kum hnih chhung hian theihtawpin an bei a, Force lama hotute pawhin smuggling thil leh ruihhlo chi hrang hrang an man a, tunah chuan hetiang lam hi a tawmim chho viau ta tih a sawi.
Health minister chuan ruihhlo ngaite enkawlna atan leh buaipui nan sorkarin Rs nuai 113 an sen tawh thu leh, ruang phurhna atan Rs nuai 150.57 a seng tawh bawk a. Tun thlengin damdawi in hrang hranga damlo mi 44,546-te inenkawlna bill peksak an ni tawh a, sorkar sum sen zat chu Rs nuai 6,604 a tling a, phaiah mi 2,637 refer an ni tawh bawk tih a sawi.
Sorkarin ruang phurhna atan Rs nuai 150.57 a seng tawh a, mi 1,445 te ruang chu an in lumah thlensak an ni tawh tih sawiin health minister chuan, health sector hnuaia cess dawn tur atangin Mizoramah cancer vei tam lutuk hi a chhan zir chian tumin hma an la mek a, ruih theih thil, zuk leh hmuam mai bakah bazara thlai zawrhte test neih tuma hma lak mek a nih thu a sawi a. Nakkum atangin Mizoramah kal thlak (kidney transplant) theih turin an buaipui mek a, MUHCS zawmtute tan tunah hian lung (heart) pawp pawh a thlawn vekin ZMC-ah zai a ni tawh tih sawiin, “Kan ram tana tha nia kan hriatah chuan huaisen takin kan kal zel dawn a, ZPM sorkar hian Mizoram hmel thar min hmuh chhohtir zel a ni,” a ti.