- Reuben Lalnunthara Hnamte
Kumtina kan nghahhlelh thin Christian te’na kan ni hlimawm leh hun ropui Christmas chu kan hma lawkah a lo thleng leh mai dawn ta a. Mitinte he hun atan hian kan inbuatsaih a, kawr thar leh thil thar neih tumin kan theih ang tawkin kan intuak a; mitin mai hian hlimawm taka hman kan tum theuh niin a lang. Mitin mai hi mahni tawkah kan buai theuh a, dawrkai, sumdawng, mimal, chhungkua leh khawtlang leh ram thlengin he hunpui lo thleng tur nghakhlel hian kan phibuai sup sup a ni ber. Kumkhata kan hunpui neih pawimawh hle hluber a ni a, ropui thei ang ber lawm hi a phu hrim hrim a ni. Chutih laiin nula tlangvalten hmanpui tur zawngin tan an lo la bawk a, nalh lo hlau reng rengin an intuaithar a; a khawvel thil taka lo inbuatsaih leh lo lawm tum hi a tam zawk chu kan nei ngei ang. A thenin ruih chhum hmawk tumin an loin buatsaih bawk a, kohran, khawtlang thlengin kawn chei leh Biakin hmunhma cheimawi te nen. Chhungtinte lah hman nawm loh hlauvin an tu leh fate an lo inchahkhawm a, haw runpui a lo thleng leh dawn a ni. In leh a vel cheimawite nen, avan nuam thin tak em! Ram ropui zawkahte phei hi chuan October thla atang hian masi hla nen an ri chuah chuah tawh a, keini pawh a ni ve tan a, Novemberah phei chuan Dawr hrang hrang leh veng hrangah masi hla play a richuah chuah thin a nih hi.
Christmas tobul tlemin bengvar nan I han tarlang ang aw :Christmas tih chu Sap tawng chuan, “Mass of Christ” tih a ni a, chumi awmzia chu “Krista vanga puipun ni” tih a ni awm e. The Oxford Dictionary of Current English in a tarlan dan chuan “Christmas” tih chu “Annual Festival of Christ’s birth, Celebrated on 25 December” tiin. Kum zabi 3-na vel khan Rome khua chuan December ni 25 hi Christmas ni atan an lo hmang tan a ni. AD 375 vel khan kohhran ho chuan December 25 ni hi Christmas Holiday atan a puang. United States lam pawhin 1870 kum khan holiday atan an puang ve bawk a ni. Chrismas hi hman hun a in ang lo va, pawm dan pawh a in ang hek lo; sawi tur tam tak a awm rualin a pawimawh ber chu eng ni pawh ni se, kan Lal Isuan min tlan tura he khawvela mihringa alo pianna hun anih avangin ringtute tan chuan a hlu em em a ni tih riat hi a pawimawh. Sawiselna, dodalna, ngaihdan ina nglo tam tak karah leh Christmas avanga buainate chhuak a, inhnailna tam tak karah siamthatnate lo thleng chho zel a.
William Winstanly te, Charles Dicken te, Washington Irving te leh Clement Clearke Moore te hmangin Christmas chanchin rilru khawih tak tak ziah chhuah a rawn ni ta a. Ziaktu tam zawk ten Christmas hman hi chhungkaw intawhkhawmna leh hlim tlanna ni pawimawh a nihna te, Carol hlimawm zia leh Christmas thawnthu bul in\an dan lamte an thlurbing laiin, Harriet Beecher chuan a lehkhabu, The First Christmas in New England tih thupui hmanga a ziahah chuan, “Christmas awmzia tak tak hi Shopping-naah kan theihnghilh zo tawh,” tihte a ziak tel a. Chutianga Christmas lam hawi lehkhabu tha tak tak atangte chuan America mipuite chuan Christmas hi an rawn hlut chho leh ta a. Kum 1870 khan President Ulyses-a chuan Christmas chu United States Federal holiday atan a puang ta nghe nghe a ni. Tunah phei chuan American 96% chuan zalen tak leh hlim takin Christmas hi an hmang a ni. Tin, Australia ah phei chuan kum 2008 khan Guiness World Record break turin Christmas parade an buatsaih a, mipui nuai 3 chuang lai an tling khawm hmur mai a. Chu lo pawh, kum tin vawikhat an buatsaih thin, “Candle Light Night” tia an koh chu Mass hmuah nan buatsaih a ni bawk a. Chhungkaw tinten Bombati/Mombati keng fur/chhi eng fur chungin mualzawl pakhatah an chhuak khawm a, Christmas hlate a huhova sain ram pum huapa zaithiam ten Christmas hla mawi tak tak hmangin an awi a ni.
Tunlai khawvelah naupang pawhin, “Khi, khi, khi, Christma putar!” tia an koh theih khawpa mitin ten kan hmelhriat Santa Claus hi German-American Cartoonist Thomas Nast-a chuan 1863 khan a lo siam chhuak a. A siam tantirh atangin kum tin design a thlak thin a, kum 1880 atangin tuna mitin ten kan hmelhriat Masi putar design hi a lo siam chhuak ta a. Kum 1920 bawr chho atang khan khawvel hriatin a rawn lar chho a. Latin America leh khawvel ram tam takah chuan Santa hian thilpek a phur khawm a, naupang ho a pe thin a, chu chuan nausen Isua hnena thilpek hlanna a entir a ni. Christmas Card hmasa ber chu kum 1844 ah DCT Dobson-an a thawnchhuak a. Kum 1853 khan sumdawn nan Sir Henry Cole-a leh JC Horsley-a ten Mas Card an siam hmasak ber chu USA ah zawrh chhuah tan a ni. Tunah chuan kan ramah chuan Christmas card hi kan uar ta lo hle a,mobile phonete alo awm atang hian kan thlah ta deuh niin a lang. Card uar laia thiante card thawn tur buaipui reng renga han khawsakte kha a nuam danglam ve hrim hrim a ni. Mizote hian Christmas hi kum 1900 hnu lam atang khan kan hmang tan ve chauh a, Carol phei hi chu kum 1933 Christmas khan Revd PD Sena huaihawtnain thalai rualin, “Chanchin lawmawm Angel ho thu ngai ru” tih hla leh hla dangte sap hlain an sa a, Aizawl khawpui an fang a ni. Hei hi Mizo zinga Carol hmasa ber a ni. Tunah chuan kan Christmas hman dan hi a danglam chak ta hle mai a, keini naupan ve lai nen pawh a in thlau ta hle.
A hmandan lam leh a neuh neuh chu kan sawi seng lovang, nimahsela, a pawimawh ka tih deuh te hmangin a hnu I han khar teh ang:
A pakhatnaah chuan : Vantirhkohten “Chungnung berah Pathian ropui takin awm rawh se, Lei chunga a lawm êm êm mihringte hnênah rem thu lêng rawh se,” an ti a. (Luka 2:14) an tih ang khan he hunpui hi kan rem theih tawh lohte nena inremnna, chhungkaw inrem thei tawh lote inrem nan, nupa kara inremlohna awm te inrem nan hmang thei ila ava hlawk dawn em! Miin min rem theilo a lo nih pawhin keimahni lam tal hian ngaihdamna leh remna hi kan thinlungah pai ila, chhungkua inpumkhat lehnate, nupa inpumkhat lehnate lo thleng sup sup mai sela va nuam dawn ve le! He remna thu hi van miten min duhsak ber a ni si a.
A pahnihnaah chuan : Midangte tana malsawmna kan nih hun lo ni sela. Christmas hun hlimawm hmang ve theilo khawpa nun beidawng leh chaute tana malsawmna thlentu ni thei ila. Christmas hmang ve theilo khawp a chhiatna leh retheihnain a tuam mekte tana malsawmna ni thei ila. Mi dangte tana thilpek pek leh thil tha tih hian hlimna min pe thin. Thufing pakhat chuan “Mi chunga ngilneihna lantir hi kan pek chhuah theih zinga bo thei miah lo a ni a, a lo kir leh zel thin” a lo ti.
A pathumna leh a tlangkawm nan : He Lal Isua kan tana alo pianna hunpui kan hmanah hian kan thinlung a lamah I hawn ang u. Krismas tukkhat chu New York khawpui kawt thler a naupang khuangvawtu tawp ve tak hian, miin naupiang chibai an buk sup sup karah hian, Ran in lem leh Isua piang lem bulah mittui tla zawih zawih chung in, ‘Isu, thilpek hlu pek tur che ka nei ve lo, ka neih chhun hei hi ka hlan a che’ tiin a khuang chu a vua a. A hmutu leh ngaithlatu mittui tla lo an awmlo an ti. He Krismas hunah hian thinlung hawn ila, Ro thildang a ngai tawh lo. Kan thinlung kan hawn a, ama lam kan hawi hi Lal Isuan a duh ber a, chu chu he alo pianna pawh hian a entir a ni. He hunpui lo thleng turah hian I thinlung alamah hawnin amah I hnaih ve dawn em le?