Aizawl: Minister of State for Fisheries, Animal Husbandry & Dairying and Minority Affairs George Kurian chuan BJP hlau tura inzirtirna chu politics-a inbeihna mai mai a ni tih a sawi.
Dampa bial by-election atana campaign beihpui thlak tura zan khat riaka Mizoram tlawhtu, Union MoS Kurian chuan Nilaini khan Darlung khuaa vantlang inkhawm BJP-in an buatsaih thu sawiin, “Kum 1980-a BJP din a nih atangin vawiin thleng hian BJP ka ni a, Kerala state-ah ka awm a, Kristian dik tak leh tha tak ka ni bawk a, inrem lohna leh harsatna engmah ka la tawk ngai lo a ni. Chuvangin, BJP hlau tura inzirtirna hi a politics-a inbeihna mai mai a ni,” a ti.
Union MoS chuan Kerela atanga Dampa biala a rawn campaign chhan chu Dampa bialin hmasawnna an hmuh ve theihna tur a nih thu a sawi a. Darlung a thlen nan hian kawgpui zim tak leh chhe tak an paltlang a, state sorkarin a ngaihthah zia a hmu tih sawiin, lungchhiatthlak a tih thu a sawi a. Dampa bial hian kawngpui tha tak an mamawh a, kuthnathawktute tan link road te an mamawh tih a hriat bakah, mipui mamawh dang tamtak a awm a hria a. Chuvangin, Dampa bial mamawh te hi BJP candidate Lalhmingthanga an thlan tlin chuan an pe dawn tih a sawi.
Kurian chuan hmasawnna tak tak thleng tur chu Delhi leh Dampa, Dampa leh Delhi (D2D) an thlun zawm a ngai tih a sawi a. Delhi leh Dampa thlun zawm turin Dampa mipui te Lalhmingthanga vote theuh turin mipui a sawm bawk.