Aizawl: Corporate Social Responsibility (CSR) atangin chhiatna thlen thulha hman turin UCO Bank-in Aizawl Municipal Corporation hnenah Emergency Response Vehicle (ERV) an hlan.
Emergency Response Vehicle inhlanna hun hi Aizawl Mayor pisa-ah neih a ni a. AMC aiawhin Aizawl Mayor, Lalrinenga Sailo-in thilpek hi a dawng a. UCO Bank aiawhin Alok, DGM, Head Office, Kolkata, Sanjeev Roy, AGM, Zonal Head, Agartala Zone; Gautam Das, Chief Manager, Aizawl Branch leh Chin Zapau Ngaihte, Manager, Thuampui Branch ten an hlan a ni.
UCO Bank chuan ERV atan hian Mahindra Bolero Camper leh a body siam danglamna tur sum leh hmanrua (equipment), Rs nuai 15 man hu AMC hnenah an hlan nghal bawk.
Aizawl Mayor Lalrinenga Sailo chuan AMC hmalakna te a hlawhtlinna tura UCO Bank-in lirthei leh hmanrua tha tak tak, AMC an pe chu a lawmthu sawi a. Aizawl mipui tan tangkai taka hman a nih tur thu a sawi a, UCO Bank nen thawhhona tha tak an nei chu lawmawm a tih thu a sawi.
Aizawl Mayor hi Deputy Mayor R. Thanglura, Executive Corporator Lalringliana, Joint Municipal Commissioner Lalremruata Kullai leh officer dang ten an tawiawm.
AMC Board of Corporators meeting-in Emergency Responsive Team din tura a lo pawm tawh angin, AMC chu Aizawl khawpuiah chhiatna hrang hrang a thlenin AMC hminga a tul anga thawk chhuak thei turin hma a la mek a. Disaster Response Squad nei ve tura hma lain Zotrek te nen thawh hona a siam tawh bawk.
UCO Bank hi India ramah Zonal Office 43 neiin Branch 3,000 chuang an nei a. Kum 1970 khan Mizoramah office an din tan a. Tunah hian Branch pathum – Dawrpui Veng, Aizawl, Thuampui Veng (AMC Office Opposite), Aizawl leh Vairengteah an nei a ni.