Kan assembly house in an pawm tak FCAA 2023 chuan vawiin ni thlengin sawi zui a la hlawh a. Opposition party lamin duh lohna thawm an ti lian telh telh a, ruling lamah chief minister tih loh chu mipui hriata he dan pawm tak hi han fak zui hriat tur a tlem hle thung. Ruling lam MLA zingah pawh hian he dan han fak zui a, MLA te han auchhuak pap pap an awm miah lova. Tuna Dampa bial a MLA bye-election ah pawh campaign hla atana han hmang sawi tur an awm miah lo. Assembly a pawm hlim hlawt ni si dan tha tak chu nise campaign au hla berah neih awm tak a nih laiin an hmang hauh lo mai hi a thatna sawi tur a awm meuh lo a ni awm mang e a tih theih. Sawrkar laia mahni dan siam fak ngaihna han hriat miah loh mai chu thil mak tak pawh a ni. Mipuiin an ei lo tih hre reng chunga he dan hi pawm a ang ta khawp mai.
Kan ram mipui hian kan ram hauh hi kan ti na hle a. Hnamdangin thuneihna an nei tur hi chu kan rilru hian a pawm hlei thei lo chu a ni. FCAA 2023 hian kan state sawrkar thuneihna chu central kutah a hlan fel ta hmiah mai si a, mipui rilru hi a dam hlei thei lo niin a lang.
Mipui rilru a ram neitu nia inhriatna thinlung hi chuti maia reh tur a ni dawn lova, Mizo anga kan awm chhung chuan he thinlung hi a awm reng dawn. Mizote hian chim rala kan awm hi kan hlau a, chu thinlung avang chuan ram hi venhim tlat kan duh a ni. Chumi sadai rawn sawinghing a, kan ram nawr tlusawp tur chu thih thaa nawr let kan duh a ni ber.
Hetiang hi kan rilru a nih tlat avang hian FCAA 2023 hi hnawk kan la ti dawn chauh a, kan thlah lokal lehzel turte pawhin an la duh lo zel dawn a ni. Tun boruaka a lan dan hi chuan he dan nawr kiang leh a, assembly house a an duh loh thu pass leh ngam ngat sawrkar hi mipuiin an zawng dawn niin a lang.