Aizawl: MNF Sr Vice President Dr R Lalthangliana, Dampa bial by-election neih tura MNF candidate ni bawk chuan vote zawn nana sorkar hna inthlem leh hnaa indah ngheha inthlem chu thil tih chi a nih loh thu a sawi.
Dampa bial by-election campaign a neih mekah Dr R Lalthangliana chuan Nilaini khan W Lungdar, Chungtlang, Rulpuihlim, Reiek leh Ailawng khuate a tlawh a. He’ng khua a tlawhnaahte an party-ah mi eng emaw zat a lawm lut.
Khaw hrang hrang a tlawhnaah Dr R Lalthangliana chuan zirna in leh, nu leh pa rûm mekna thalai ruihhlo ngaite chhanchhuak turin NGO leh kohhranho nen tangkawpin theih tawpa hmalak a nih tur thu a sawi a. Thih leh dam inkara awm, rim taka mipuite tana thawktu health worker chawl ta thuap chu pawi a tih thu sawiin, Pathian leh mipui zarah thlan tlin a nih chuan theihtawp a hmalak a nih tur thu a sawi.
Dr R Lalthangliana chuan enchhin boruak a reh tawh a, a eng (yellow) chu a dal tial tial a, rawng pawl chu a tak tial tial tih sawiin, “Enchhin boruak ral tawhah, en tawh ho atangin mipuiin min buk tawh dawn a ni,” a ti.
MNF candidate hian vote zawn nan sorkar hna inthlem nana hman leh hnaa indahngheha inthlem chu thil tih chi a nih loh thu sawiin, MLA-ah vawk ruk lai thlantlin a nih ve tawh thu leh cabinet minister a lo nih tawh atang pawhin a tih ve ngai loh thu a sawi a. “Dam chhunga mi huat nih hlawhna a ni,” a ti.