Louisville, Kentucky tumhmun atanga a thlawk chhuak tur UPS bungraw phur thlawhna chesualah a chuang mi pasarih an thi tih state governor-in a sawi.
Louisville Muhammad Ali International Airport atanga Thawhlehni tlai dar 05:15 (India-a Nilaini zing dar 03:45)-a thlawhna thlawk chhuak tur chesualah hian mi 11 vel hliam awm bawkin a kang nasa hle.
Kentucky Governor Andy Beshear-a chuan thlawhnaa thawk mi pathum pawh an thih tel a rinawm thu a sawi a. Thuneitute chuan hliam tuarte pawh thenkhat na tak tak an awm avangin thi an awm belh a rinawm hle tih an sawi.
UPS flight 2976 hi Honolulu, Hawaii pan niin tuialhthei gallon 38,000 phur niin Louisville tlankawng atanga tlan liamin a bula in lian tak ding a su a ni.
A puak alh hian a bula petroleum recycling company telin sumdawnna hmun pahnih vel a khawih tel a. Tum hmun atanga mel nga bial chu thil puak leh boruak bawlhhlawh nasa tak awm thei laka inveng tura tihna tihchhuah nghal a ni a, a hnuah mel khat bial tia tihzim leh a ni.
Chhiatna thleng avang hian Thawhlehni zana tumhmun atanga thlawk chhuak tur dangte chu thulhtir vek an ni tih airport chuan X-ah a tar lang.
Louisville Fire Dept Chief Brian O’Neill chuan kang hi an thelh nghal deuh vek thei a, National Transportation Safety Bureau (NTSB) investigative-in a thlen chhan an chhui dawn tih governor-in a sawi bawk.