Aizawl: Nilaini zing khawvar hma 3:20 vel khan Lawngtlai Vengpuia Vanlalawii chenna in, Assam type chu a chimin mi panga a chim hnan a, vanneihthlak takin mihring thi leh hliam an awm lo.
Thu dawn danin, Thawhlehni khan Lawngtlaiah hian zankhuain ruah a sur a. In chim ta Vanlalawii te bula Syntex an dah chu ruahsur vang hian zankhuain a liam a, hei hian an in chhehvel lei chu tihnipin a chim ta nia ngaih a ni.
In chim hi Mizopa chhiara chhawng hnawh niin, in chim lai hian mi panga an riak a, heng mite hi in hian chimpui vek mah se, vanneihthlak takin thi leh hliam na lutuk an awm lo a ni.
Vanduaina a thleng tih hriat a nih ve leh mitlawmngaiten chhanchhuah hna an thawk nghal a, Nilaini khan Lawngtlai Vengpui VC leh YLA in Vanlalawii te chenna in tur hi an ngaihtuahpui nghal a ni.
Nilaini vek khan in chimna hmun hi Lawngtlai Bawrhsap Donny Lalruatsanga, Lawngtlai District Disaster Management Authority (DDMA) Chairman ni bawk chuan a tlawhin, chhiat tawh dan a enfiah a. Chhiat tawkte puala sorkar atanga tanpuina awm thei ang ang chu pek a nih tur thu sawiin, hnatlang thawkte thingpui lumna tur sum fai leh Silpaulin a hlan nghal bawk.