Pep Guardiola chuan Premier League-ah Liverpool emaw, Arsenal emaw an champion a nih ngat chuan pawisa an hman hnem vang a nih tur thu a sawi.
Liverpool chu season kal meka league-a vawi 10 an khelh tawhah pathumna ni mekin a tir inkhel panga an chak vek a, che sual zeuh mah se kawng dik an zawh telh tawh a. Nipui bazar inhawn lai khan Alexander Isak, Florian Wirtz, Hugo Ekitike, Jeremie Frimpong, Milos Kerkez leh Giovanni Leoni te lak luh nan £ maktaduai 400 chuang an hmang a ni.
Arsenal pawhin Viktor Gyokeres, Eberechi Eze, Martin Zubimendi, Noni Madueke, Cristhian Mosquera, Christian Norgaard, Kepa Arrizabalaga leh Piero Hincapie te an la lut a. Tun thleng chuan an bazar fuh tih theih turin league-ah hma an hruai mek nghe nghe.
Guardiola chuan, “Ka thianpa, Mikel Arteta hian league nomawi a la a nih chuan a player-te thawhrim vang a ni lo ang a, pawisa a hman hnem vang liau liau a ni ang,” a ti.
“Liverpool pawh chutiang bawk chu an ni a, Arne Slot hian a champion-pui leh a nih chuan pawisa a hman hnem vang a ni dawn chiang bawk,” a ti a ni.