Kuki hel pawl zinga Sorkar laipui leh Manipur sorkar nena beihpui thlak chawlhsan (Suspension of Operation (SoO)) tura inremna ziak ve lo zinga mi, United Kuki National Army (UKNA)-a tel mi pali chu Thawhlehni tuk khan Manipur-a Khanpi khua, Churachandpur atanga khawthlang lam km 80 vela hlaah kah hlum an ni.
Assam Rifles-in an sawi dan chuan sipaiten mi zawn beihpui an thlak laiin helho hian an lo kap a. Venhim hna thawktute hian bei letin a hmunah hian mi pali an that a ni.
Hemi hnuah hian Indian Army nen Assam Rifles hian nilengin a bul vel ramngawah beihpui thlakin hel dang zawn hna an thawk zui bawk.
Thuneitute chuan UKNA mite hi tharum thawhnaah an inhnamhnawih nasa hle niin an sawi a. Tun hnaiah khaw lal an that a, tual chhung mite pawh an that a, heng lai vela muanna awm chu tihchhiat an tum hle niin an sawi.
“Mi firfiakte thah an ni hian Indian Army leh Assam Rifles hian Manipur-a civil mite hum leh muanna vawn nun tlat an tumzia a tilang a ni,” tiin sipai thuchhuahah tar lan a ni.
Kuki hel pawla mite thah an nih hnuah Kuki pawl hrang hrang – Kuki Inpi Churachandpur, Kuki Chiefs Association, Kuki Women’s Union leh Kuki Students’ Organisation chuan thuchhuah intawm siamin inthahna an dem thu an tar lang a. ‘A lungchhiatthlak’ tia sawiin venhim hna thawktute leh hel pawlte chu inbengdaia hetiang thil thleng zel tur tidai turin an ngen.
Heng pawlte hian Churachandpur district pumah hel thah takte vui niah a sunna inkhar turin an ti a. Hun rei tak atanga an lo phut tawh ching fel turin sorkar chu inbiaa Kuki–Zo chenna laia inawpna hran siam tura an inhawn an duh tih an sawi nawn.
Hel thahna avang leh thite avanga inkhar koh a nih avang hian Churachandpur pumah venhimna khauh taka kalpui zui nghal a ni tih thuneituten an sawi.
Tar lan tawh thin angin Manipur-ah hian May, 2023 atanga tlangrama cheng, Kuki leh phaizawla cheng, Meitei inkara buaina chhuak avangin mi 260 chuang an thi tawh a, mi sang telin an in chhuahsanin hmun him lam an pan.
Tharum thawhna zualpui chu reh tawh mah se a khât tawkin hnam hnih inepna siam thei thil a la thleng zauh zauh reng a ni.