TV Show lar Comedian Search an tan leh ta a, chawlhkar hmasa lama Selection Round an neih hnuah October ni 30 zanah First Round an tan ta.
LBS Durian Furniture Comedian Search-ah hian first round-ah mi 50 chuang an inel a, Zirtawpni zan kalta khan First Round zan hnihna an ti a. November ni 28 zana zawh fel an tum.
Tun tumah hian fiamthu thiam hriat sa an awm nual a, First Round zan khatnaah mi thar tha tak tak an awm nual bawk.
Host Puii Pautu-in a zan khatnaah ngainat a hlawh nghal a, co-host Lalsangzuala (Pu Thangthuama) pawhin a hna a tlin leh hle.
Comedian Search hi 2008-ah a vawi khatna an buatsaih a, Covid-19 vanga 2020-a an neih theih loh bak chu kum tin an la nei thei. Mizorama TV show kan neihah kum tina neih theih awm chhun a ni ang.
Comedian Search hian mipuite ngainat a hlawh a, chhungkuaa hlim taka en theih a nih avang te, mipuiin fiamthu an hlimpui avang te hian ngainat a hlawh niin a lang.
Chief organiser Mapuia (H Rotluanga) chuan, “Kan rin phak bakin Comedian Search hi mipuiin an lo ngaihlu a, kan lawm khawp mai. Keini pawhin mipuiin an ngaihhlut avang hian kum tina tih kan tum ve hram hram a, harsatna karah pawh buatsaih kan tum hram hram thin,” a ti.
“Family show a ni a, chhungkuaa enho theih, naupang atanga tar thlenga an hlimpui theih tur ni se kan duh a, mi tinin lo hlimpui se kan duh. Mipuite tihlimtu ni se, chu chu kan lawmna a ni,” a ti bawk.