Aizawl: Gauhati High Court, Aizawl Bench-a Chief Justice (Gauhati High Court) Ashutosh Kumar leh Justice Michael Zothankhuma-te thutna bench chuan Kawnpui leh Sairang inkar kawngpui dinhmun tha lo chungchanga Mizoram Truck Drivers’ Association (MTDA)-in PIL a thehluh chu Ningani khan a ngaihtuah a. NHIDL leh M/s J Infratech Ltd. te chu an kawng siam thlalak affidavit hmanga court a thehluh turin a ti.
Supreme Court Advocate on Record JC Lalnunsanga tar lan danin September 24, 2025 court order angin NHIDCL chuan an insawi fiahna thehlutin Kawnpui leh Khamrang (118 to 130 kms) inkar chu July, 2025 khan PWD kut atanga an lak thu an sawi a. Bilkhawthlir – Kolasib (70-95 Kms), Kawnpui – Khamrang (118-133 Kms), leh Buichali–Sairang (147.8-159 Kms) kawng inkarte chu siam that hna lo thawk lailawk turin (short term maintenance work) M/s. J Infratech Ltd chu June 4, 2025 khan NHIDCL chuan an ti a. Hemi hna lo thawh lailawk tura work order chu July 7, 2025 khan NHIDL hian M/s Infratech hnenah tihchhuah a ni a. NHIDCL leh M/s. J Infratech Ltd te chu kawng khuar hnawh khahte, lei min leh tui luan kawr then faite, lung remte leh a dangte siam hna thawk turin an ti a ni.
Ruah sur nasa leh motor veivak an tam avangin hna hi thawh chak theih a ni lo tiin court an hriattir.
NHIDCL insawi fiahna chu court hian thutlingah pawm lovin kawng siam ngei a nih tihchian nan kawng siam thlalak chu affidavit hmanga thehlut turin a ti.
M/s. J Infratech Ltd. chu court hmaa inlan tura hriattir ni mah se, an inlan lo va. Court chuan a lungawi loh thu sawiin M/s. J Infratech Ltd chu an hnathawh chin bakah an hnathawh thlalak kimchang nena affidavit hmanga court hriattir turin a ti a. Court hmaa an inlan lo nawn leh a nih chuan he kawngpui hi Mizoram tana a pawimawh em avangin court-a inlan turin warrant of arrest chhuah thlengin an ngaihtuah ang tih a sawi lang a ni.
Thubuai thehluttu chuan tun hnaia kawngpui dinhmun chhe tak avangin nunna chan an awm tawh thu chu court a hriattir a, court chuan thil awm danah a lungawi loh thu a sawi a ni. He case hi November 25, 2025-a ngaihtuah leh turin a ruat a ni.
Hemi case PIL No. 2 of 2025 -ah hian thubuai thehluhtu tan Emily Chhangte a ding a. Samuel Vanlalhriata chu NHIDCL tan dingin, Vanneihsiami chu sorkar tan a ding.