Aizawl: Mizoram Institute of Advanced Studies (MIAS) Governing Board chu an Chairman, Chief Minister Lalduhoma hovin Ningani khan an thukhawm.
Chief Minister’s Conference Hall-ah thukhawmah Mizorama sorkar laipui enkawl research institute dinna tura kawng zawngtu leh hma latu MIAS hi a tir atanga bul tan anih dan leh a kalzel dante thlir ho a ni a. MIAS Rules & Regulations leh Mission, Vision & Objective te en ho bawk a. Ngun taka an sawiho hnuah heng zawng zawng en tha turin MZU Vice Chancellor hlui Prof. R. Lalthantluanga kaihhruaiin Review Committee an din a. He committee-ah hian MIAS Governing Board vice chairman leh member secretary-te bakah NIT, Mizoram Director leh Dr. Rohmingmawii, Associate Professor, Pachhunga University College-te an ruat bawk.
MIAS office atan thawktu dah thar chungchangte, sum leh pai pek dan tur chungchangte, institution dangte nena thawhhona chungchangte sawiho a ni bawk.
MIAS hi kum 2011 khan Mizoram sorkarin a din a, Planning & Programme Implementation Department chu Nodal Department an ni.