Dampa bial bye-election neihna tur ni a hnai zel a, political party hrang hrangin an party in hnehna an chan ngei theih nan an thutchilhin, an mi leh sate an uap chawt tawh a, lamtang neih ngah tumin an hmanhlel nasa tawh hle.
Inthlan dawn hnaih apianga thleng nasa fo thin inlawmluhsiak boruak pawh nitin hriat tur a awm reng bawk. An mi lawmluhten an pui chhunzawm em tih erawh vote chhiar huna hriat chauh tur a ni ta.
Kan sawi thin angin Dampa bial hi hnam tenau zawkte chenna leh awmkhawmna bial zinga mi a ni a, tunah pawh hian heng hnam tenau zawkte hian an hawi lam thui tak a hril ngeiin a rinawm.
Chutih rual erawh chuan heng hnam tlem zawkte hi kan tlawn leh duhsak luat a thleng ang tih kan hlauh a, kan inven sauh sauh a va tul em. Party tinte pawhin chintawk an hriat thiam a tha hle. Heng hnamte zingah hian fel tak tak leh rilru puitling tak tak, dikna duh mi pawh an awm ngeiin a rinawm, mahse an ‘masi’ hun ang hrima ngai pawh a awm nuk dawn tih kan hriat tel a tha awm e.
Sum leh therhlo hmang lo tura kohhran hruaitute lamin min ngen chamchinate hian kan ramah rahtha a chhuah chhoh bek bek zel a, khaw tam takah MPF hmanga inthlanna muanawm tak leh felfai a awm chhoh tan mek lai hian hnam tenau zawkte rilruah erawh chutiang ngaihtuahna pu lem lo thahnem tak an la awm tih a chiang reng.
Kan party hruaitu hrang hrangte hian hnam tenau zawkte tihdan leh an laka vote zawn dan chintawk an hriat a, thusawi chin tawk an hriat pawh a va tul em. Tute emaw anga lamtang ngah duh luata tawngkam chhuah ve ringawt hi a him lohna chin a awm fo tih i hre thar fo ang u.