English club-ten Europe an awp a tih theih a, tun season Champions League inkhelah pawh a vawi hnih nan Premier League club inlan panga tlawm an awm lo leh ta.
Tun kar inkhel vawi linaah Arsenal, Liverpool, Manchester City, Newcastle leh Tottenham an chak vek a, an zinga pali phei hi chu a sang pariat dinhmun luah mekin knockout round lut tlang nghal thei dinhmunah an ding mek.
Chelsea chiahin point thum an hmu zo lo va, Nilaini zanah rin loh takin Qarabag nen 2-2-in an inhnehtawk a; mahse, 12-naah awmin an dinhmun a chhe viau chuang lo.
Champions League-ah hian tun hma zawngin ram pakhat atangin inkhel thawh khata club panga chak an la awm ngai lo va, tun season-ah hian England atanga team tel chuan vawi hnih an ti thei der ta.
Tun season-ah hian bul an tan that em avangin a vawi khat nan Arsenal chu Champions League-ah an champion mai rin ber a ni mek a, inrinsiakah pawh ringtu ngah ber an ni.
Bayern Munich leh Inter Milan chu league phase-a kaltluang dang niin point 12 hmuh theih an la hmu kim vek hlawm.
Goal thun lamah Arsenal hian vawi 11 thun tawhin an la chhuah ve lo va, an aia thun tam chu Bayern Munich, Paris St-Germain (14 ve ve), Borussia Dortmund (13) leh Barcelona (12) an ni.
English team-te hian ram dang an tum vawi 24-ah vawi 17 hnehna an chang tawh a, goal 56 an thun a, ram dang zawng aiin 14-in an thun tam a, goal 17 chiah an la chhuah a. French team-in an chhuah tlem zawk a; mahse, anni chuan club pathum chauh an thawh thung.
Heti taka English team an chet that chhan langsar tak chu an sum neih tam vang a ni a. Player lei nan an inseng tam ngam a, hlawh pawh an pe sang ngam zawk bawk a, player tha an hip lo thei lo.
Premier League club-te hian TV-a an inkhel tihchhuahna manah sum an la lut tha em em a, hei hi ram dang zawng zawng aia an sum dinhmun that chhan pawh a ni.
Nipui bazarah khan Premier League club-te hian £ tluklehdingawn 3 hmang tlingin an hman tam ber tum a ni.
Tun tuma an pawisa hman hi Bundesliga, La Liga, Ligue 1 leh Serie A club zawng zawng aiin a tam zawk.
Sum a tam chuan squad a chhah lo thei lo va, Arsenal pawh inseng nasa zingah telin Premier League-a hma an hruai bakah Champions League-ah hmahruaitu pahnih zingah an tel theih phah a tih theih.
Tun hi Champions League season khata ram pakhat atanga club paruk an inlan vawi khatna a ni a, knockout round an luh vek chuan record thar an siam dawn bawk.
Kum 2017 khan Chelsea, Liverpool, Manchester City, Manchester United leh Tottenham an lo tlang vek tawh a, England hi club panga knockout stage lut vek thei an lo ni tawh bawk.
Hemi season hian Liverpool leh Manchester City chuan knockout round hmasa ber an kalpel a, Reds hian final an inpet kai a City hi quarter-finals-ah an tla thung.
Final-ah Liverpool hi Real Madrid-in an hneh zui bawk.