- Laiu Fachhai
Vanglaini chanchinbu (01 November 2025) a “FCAA 2023 leh Article 371G hi politics game khelhna atan kan hmang chhunzawm zel dawn em?” tih thupui hmanga Pu Lalnunmawia Pachuau article ziah kha ka chhiar a. Forest (Conservation) Amendment Act, 2023 (FCAA 2023) chungchanga ka hriat loh leh zawhna ka neihte a chhang tha chauh ni lovin facts leh figure nen thlapin a chhang kim hle a, a lawmawm takzet a ni. Informed leh objective article a ni e.
Kan ram leh hnam himna tura kan ngaih Mizoram special provision Article 371G lah chuan, “Article 371G-a provision-te hian state nih hma, union territory nih hun laia mi leh 53rd Amendment Act, 1986 pian hmaa mi Central dân hman tawhte a huam lo ang,” tih proviso clause a lo nei khang lang a. A hun laia kan hotute khan, Nagaland special provision Article 371A-in proviso clause a nei lo ang hian, Mizoram special provision Article 371G-ah pawh hian proviso clause dah lo turin an lo nawr tawh si lo a. Chuvangin UT kan nih hun laia Central Forest dân kan hman tawh Forest (Conservation) Act 1980 (FCA 1980) chu Article 371G hian a huam ta lo a ni. FCA 1980 dân thenkhat chu amend niin FCAA 2023 a lo chhuak a, FCAA 2023 dân chuan Mizoram pawh a huam ve ta a ni. Amend lo FCA 1980 chauh kha lawm Article 371G-a proviso clause hian a huam; amendment awm zel turte a huam tel vek hlei nem, tia dân lama inhnial theihna tur erawh chu a awm ve awm e. A eng a pawh chu lo ni se, Parliament-in a pass a, Mizoram State Assembly pawhin a pass ve tawh chuan, FCAA 2023 chu Mizoram tan pawh dân ding lai a ni ve ta a.
Kan hriat theuh angin Mizoram hi a ram total area atanga chhut chuan Indiaa ramngaw (forest cover) nei tha ber state kan ni mek a, Mizoram total area sq km 21,081-a sq km 17,820 chu ramngaw (forest cover) a la ni rih a ni. A awmzia chu Mizoram hi hmun ngaa thena hmun li aia tam (84.53%) chu ramngaw a ni. Chuvangin sik leh sa a tha a, ruahtui pawh kan nei tha hle. Record thenkhata a lan danah chuan Mizorama forest cover sq km 17,820 chhungah hian sawrkarin forest rama a puan total Recorded Forest Area sq km 5,641 a awm a, chung zingah chuan Reserved Forest area sq km 4,483 leh Unclassed Forest area sq km 1,158 a awm a ni. Protected Area (National Parks & Sanctuaries) sq km 1,241 a awm bawk. Chutianga ramngaw (forest cover) nei tha ber kan ni mek lai chuan, kum tina lo hmun sawna lo vah leh lo hal avangin Mizorama nungchate leh ramgngawte chu chereu lam an pan deuh deuh zel a, hei hi nungchate leh ramngawte humhalhna kawngah chuan FCAA 2023 ai pawha pawi khawih thui thei zawk tur a ni awm e.
Mizoram hi a zau lam chu zimte a ni a, km 121 vel chauh a ni. Chu state zimteah chuan km 722 laia sei international boundary kan nei a. Chuvangin Union sawrkarin tul leh pawimawh a tih ang zela ram pumpui tana thil tha tur leh security lam project pawimawhte a siam theihna tur international boundary atanga km 100 huam chhunga awm forest ram tih hian, Mizorama Recorded Forest Area leh Protected Area zawng zawng deuh thaw chu a huam vek dawn a ni. Ramngaw (forest cover) dangte erawh chu FCAA 2023 dân hian a huam lo hmel a, ramngaw dangte chu non-forest purpose atana divert duh a nih chuan dân awm sa zawh tur a ni awm e. A eng a pawh chu lo ni se, pawnlâng taka thlir chuan, international boundary atanga km 100 huam chin hi zau tak tur anga a lan avangin hlauhthawn theihna tur chu a awm ngei mai. Nimahsela a nihna dik tak (ground reality) ah chuan, ecology leh environment mita thlir pawhin chutiang em ema hlauhthawn tur leh ram leh hnam tana pawi khawihna tur chu a nih a rinawm loh. Blanket approval neia duh duhna hmun leh hunah duh duha project siam leh kalpui a ni dawn lo. Mithiamten an zir chiang ang a, case by case merit basis-a kalpui a, forest clearance pek a ngai zel dawn tho avangin hlauhthawn lutuk tur niin a lang lo.
Mizoram hi hmasawn tak tak kan duh chuan infrastructure leh development project leh program te kan nei tam a ngai a. FCAA 2023 dân phalna hnuaia infrastructure leh development project dangte kalpui avanga nungchate leh ramngawte a ti chereu tur hi controlna awm lova kum tina lo hmun sawna lo vah leh lo hal avanga nungchate leh ramngawte a ti chereu nena tehkhin a nih chuan controlna hnuaia permanent hmun neia infrastructure leh development project te kalpui chuan nungchate leh ramngawte a humhalh tha phian zawk theihna tur kawng a awm ve tih te pawh ngaihtuah tel a tha hle awm e. Development project a tam chuan Mizorama unemployment problem eng emaw zat chu a sutkian ang a, chutichuan lo vah leh lo hala ei zawngtu population pawh a titlem zawk ang a, nungchate leh ramngawte humhalhna chi khat a ni ve dawn a ni. Industry leh green (ramngaw) te hi an kal kawp thei a ni. Entirnan, Taiwan chu industrial ram a ni a, mahse ram green tak a ni.
FCAA 2023 dân hi Mizoramah kalpui a nih pawhin mipuite aiawha thlan Central leh State sawrkara thuneihna chelhtute chuan mipuite aw an ngaithla ang a, ram leh mipuite tana tha tur leh tha lo turte an hria a ni tih ring ngam ila a tha awm e. Mizoram hi semi-tropical sik leh sa nei ram a ni a, a leilungte a derthâwnzia Central leh State sawrkar te chuan an hria. Forest ram chhungah infrastructure project, mining, military base, military industry leh development project dangte tan ram zau tak duh duhna hmuna siam a nih chuan, forest ram a zim tulh tulh ang a, industrial pollution avangin project site chheh vela nungchate leh ramngawte chereu-in phûl ram leh thlalêr ramah a chang ang a, lui tuite an kang zel ang a, sik leh sa pawh a inthlak danglam thei a ni tih pawh an hria. Chuvangin Mizoram anga tlang ram leilung derthâwngah hian chuan ecology leh environment te ngai pawimawh a, limitless exploitation of land for the sake of development and profit ni lovin sustainable development an tih ang chi hi mithiamte rawnin Central leh State sawrkar chuan case by case merit basis-in an kalpui beisei ila sawrkar leh mipuite tan hnehtu ni ve vena (win-win) dinhmun a awm thei ang.
Chutih rual chuan indigenous (“tribal”) hnamte ram chungchang a nih chuan State leh Union sawrkarte tan hriat tur pawimawh em em thil pakhat a awm a. Indigenous hnamte tan chuan ram leh leilungte hi sumdawnna leh development atana hman theih neihsum (property) satliah an ni lo. Kan tobul (root) leh kan nihna (identity) a ni a, thinlunga kan vei ber leh kan lung min lentu ber a ni. Chuvangin phai lam ram tha leh nuam atangin leh ram hmasawn foreign ramte atang pawhin he kan ram riangte leh tlang chhipa awm kan thingtlang khuate hi ngaiin, Lianchhiari ang khan kan lung a leng thin a nih hi maw. Chuvangin Mizorama indigenous hnamte tan chuan kan ram hi kan tobul (root) leh kan nihna (identity) a ni a, emotional attachment kan neihna a ni tih hi Central leh State sawrkarte chuan an hriat thiam a pawimawh takzet a ni. Forest ram huam chhungah project liante kalpui a nih chuan project lian awmna chheh vela khuate chu sawn (relocate) a ngai mai thei a, an root, identity leh emotional attachment awmna an khua leh ram an chhuahsan hlen tur chu a lungchhiatthlak hle dawn a ni. An khua leh ram ata pawh phawi (uproot) te tan chuan human tragedy a tling ngei ang le. Chuvangin Kenyan scholar John Mbiti chuan, indigenous mite tan chuan an khua leh ram atanga pawh phawi chu mihring chunga rorêlna dik lo leh thil tih dik lo (injustice) lian tak a ni a ti hial a ni. Chu sentiment chu Central leh State sawkarten min hriatpuiin min zahsak sela, Mizorama project siam turte chu case by case merit basis-a fimkhur taka an kalpui a pawimawh dawn a ni.
A tawpah chuan leilung hi Pathian siam leh Pathian ta a ni a, keini chu Pathian leilung luah hawhtute mai kan ni tih kan hriat thar theuh a pawimawh hle. Mizoram leilung derthâwn em em hian limitless exploitation a dawl zo lo ang tih hria a, siamtu leh min luah hawh tirtu Pathian duh dân anga a leilung hi fimkhur tak leh zah taka hman leh enkawl turin mawhphurhna kan nei. Pathian leilung Mizoram hi i enkawl tha ang u.
LALPA Pathian chuan mihring chu a hruai a, Eden huanah chuan hnathawk tûrin leh huan chu enkawl tûrin a dah ta a (Genesis 2.15, ziaktu lehlin dan).
Ram chu hralh hlen tûr a ni lo; ram chu ka ta a ni a, nangni chu mikhual, ka hnêna khawsai mai in ni si a (Leviticus 25.23, ziaktu lehlin dan).