Japan chuan an ram hmar lama tun hnaia savawm tam lutuk man khawm turin sipai a tir chhuak a. Tual chhung thuneituten savawmin mihring a beih a pung nasa tia man khawm an tumna chu an pui dawn a ni.
Nilaini khan beihpui thlakna hi thingtlang khua, a bul vel ramngaw chhah takin a hual, Kazuno-ah an tan a, heng lai hian tun hnaiah savawm hmuh a tam thar hle a. Chawlhkar eng emaw zat chhung chu mi chengte pawh ramngawa kal lo tur leh thim hnu, savawmin chaw an zawn laia pawn chhuak lo turin an inti a ni.
“A reng tur ni lo mah se SDF-in min puihna hian min chhawk hle a ni,” tiin an khuaa bear department enkawltu, Yasuhiro Kitakata-a chuan a sawi.
April thla hnu lam atangin Japan-ah hian savawmin mihring a beih vawi 100 chuang awm tawhin mi 12 an thi niin environment ministry chuan a chhinchhiah a. Thi zinga hmun thuma thena hun hnih hi Iwate bul, Kazuno pawh a awmna, Akita prefecture-ah a ni.
Akita-a thuneitute chuan miin savawm an hmuh pawh a let ruk chuanga pungin vawi 8,000 chuang hmuh tawh niin a beih pawh a tam ber kum a ni tawh a, an governor chuan kar hmasa khan Self-Defense Forces puihna hi a dil a ni.
“Khaw mipuite hi ni tin hlauvin an awm a ni,” tiin Kazuno Mayor Shinji Sasamoto chuan a ti a, sipaite hi truck leh jeep, thira siam leh map lian tak nen an thawk chhuak a ni.
“Nun nuamin mi an awm theih loh phah a, pawn chhuah leh hun pawimawh hman tur tam tak pawh thulh phah a ni,” tiin mayor chuan a sawi.
Sipaite hi thira siam thang nen thawk chhuakin savawm an man ang a, suat turin mi thiam bik hmangin an tihlum zui dawn a ni.
Mi 30,000 vel chenna, nipui laia lui mawi tak tak leh khaw thlir nuam tak nei, apple thlum an neih that avanga lar bawk, Kazuno khuaa beihpui an thlak zawh hian sipaite hian Odate leh Kitaakita an pan leh dawn a ni.
Tun hi Japan-a ram sa tam lutuk thun tura sipai tirh an nih vawi khatna a ni lo va. Kum 10 liam ta velah khan thlawhna atangin ram sazuk tam lutuk an lo pel thawl tawh a, kum 1960 chho velah khan sangha mantute him nan sipaite hian sea lion an lo suat tawh bawk.