India ram pum huapa table tennis inelna ngaihhlut, 3rd UTT National Ranking Table Tennis Championship khelh zawh takah Jeho Himnakulhpuingheta chuan bronze medal a vaw chhuak.
Mizo tlangval hi mipa maltan huangah a inlan a, champion phak ta chiah lo mah se senior huanga a thlen chin hi Mizoram tan chuan rahbi thar a ni a, Mizo player dangin an la tih theih ngai loh a ni.
Kum bithliah inelna hrang hranga lo hlawhtling tawh, Jeho-a hian semifinal a thleng a, final luh inchuhna inkhelah national champion lo ni tawh, Ronit Bhanja lakah 2-4-in a chak lo a ni.
Semifinal kalkawngah hian player tha bik, Commonwealth Games gold medal pawh lo la tawh, Sanil Shetty chu deciding game-ah 11-9-in a hneh a, player 362 inlan zingah pawh a thiam leh langsat zinga mi a ni phak.
Mizoram Table Tennis Association (MTTA) chuan, “3rd National Ranking Table Tennis Championships 2025, Indore-a khelh zawh tak a inelna ngaihhlut hlawh ber men’s singles inelna huanga bronze medal la a, rampum huap table tennis senior level-a Mizoram hming rin lut a, tihmingthatu Jeho Himnakulhpuingheta kan chhuangin kan lawmpui hle a ni,” an ti.
Jeho-a hian Nilaini tlai khan Mizoram a lo thleng a, MTTA huaihawtin Lengpuiah lo hmuah a ni.