Aizawl: Tun dinhmunah hian MGNREGA hnuaiah job card 2,12,043 pek chhuah tawh niin active job card 2,10,574 (99.30%) awm a awm a. Active job card leh active worker awm zatah Mizoram chu a ti tha pawl a ni.
Rural Development & Administration Department (RD&AD) hnuaia scheme hrang rang hmalaknate thlirletna chu Ningani khan Aijal Club-ah neih a ni a. Hmanpuitu, RD&AD Minister Prof. Lalnilawma chuan RD&AD chu thingtlang mite innghahna ber leh khawtlang tihhmasawnna tur thil tangkai hrang hrang siamtu a nih avangin chak taka hnathawh zel a pawimawh thu a sawi a. Field level-a thawktute pawhin an hna dik taka an thawh a pawimawh tih a sawi.
RD&AD minister chuan MGNREGA hnuaia thawktuten hlawh a huna an la lo chu pawi a tih thu sawiin, sum awm reng mah se technical problem vangin an hlawh pek chhuah a la nih theih loh thu a sawi a. Hlawh an lak vat theih nan hma an lak mek thu a sawi bawk.
He huna tar lan a nih danin tun dinhmunah hian MGNREGA hnuaiah job card 2,12,043 pek chhuah tawh niin, active job card 2,10,574 (99.30%) a awm a. Worker 2,37,079 awmin active worker 2,10,900 (88.95%) an awm a. Active job card leh active worker awm zatah Mizoram chu a ti tha pawl a ni a. FY 2025-26 atan tun thleng hian person day 51.59% zawh tawh a ni a. Ni riat chhunga hlawh pek chhuah zat 92.42% niin, hetah pawh hian Mizoram chu a ti tha pawl a ni a. Aadhaar based payment system (ABPS) pawh tha taka kalpui niin, district pathum – Hnahthial, Khawzawl leh Lawngtlai-ahte 100% a kalpui a ni.