Chief Minister Lalduhoma chu election Model Code of Conduct (MCC) bawhchhiaah puhin Chief Electoral Officer (CEO) hnenah MNF party Legal Board-in complaint an theh lut.
October 1, 2025-a chief minister-in ZPM party tana Silsury-a a campaign-naah, ‘Kan hruaitu hmasaten Mizo mipuite leh Chakma inkarah inhuatna chi an lo tuh a, hruaitu hmasaten Chakma huat dan min lo zirtir tawh thin a ni,’ tih a sawi chu duh tawk mai lova chief minister hmasa, Zoramthanga thu sawi ni awm takte tar langin, Chakma-te fuihpawrh tumin thu mak tak tak a sawi chhunzawma ram hruaitu lu berin dan ding lai, MCC hre reng chunga tun by-election neih tura a awmna party chakpui a duh luat avanga hnam tlem zawk, Chakma-te hnena a chipui Mizote leh ram hruaitu hmasate a chhe thei ang bera a hek duh chu pawi an tiin, demawm an tih thu MNF Legal Board member Saihmingliana Sailo chuan a sawi.
Saihmingliana Sailo chuan chief minister thusawi hian Representation of the People Act hnuaiah ‘Party tumahin hnam leh hnam emaw chi leh chi emaw, sakhuana emaw, inkara inhuatna emaw, innghirnghona lam kaihhnawih engmah hmalakna lam hawi an ti emaw, an sawi emaw tur a ni lo’ tih chu chiang takin a bawhchhia tih sawiin, Mizoram chhung ngeia chi leh chite inkara inhuatna chawk chhuak thei thil a sawi chiam chu pawi an tih thu leh an en liam mai dawn loh thu a sawi.
Hei bakah hemi ni vek hian CM hian mipuite chu an party candidate an vote loh chuan sorkar atanga hamthatna an hmuh turahte hrekah a vau bakah, hamthatna chi hrang hrangte tiamin Silsury kawng siamna tur Rs. vbc. 100.40 dah fel a nih tawh thu leh kawng tha siamsak an nih tur thute bakah kawngpui, border trade, CM special package, mi rethei in sak tanpuina leh an mamawh dangte pek an ni dawn tiin a sawi, tih Saihmingthanga Sailo chuan sawi bawkin, heng a thu sawite hian MCC chiang takin a kalh niin a sawi bawk.
“CM berin dan chunga leng nia inngaia dan pawisakna chhe te mah nei loa a chet vel avang hian vawiin (6.11.2025) hian CEO hnenah hma la tura ngenna/complaint kan thehluh a ngai ta hi vanduaihtlak kan ti hle,” tiin Ningania Aizawl Press Club-a thu thar thehdarhtute a kawmnaah Saihmingliana Sailo chuan a sawi a ni.