Mizoramah hmeichhiate chunga hleilenna a pung nasa, February 2025-ah thubuai 12,750 a kai.
Hmeichhiate chunga hleilenna thleng thin tihbo kawnga hmalakna tur, Gender Based Violence (GBV) Solve Project chu Social Welfare Minister Lalrinpuii’n MINECO-a a pisaah Ningani khan a hawng a. Project hi Aparajita leh J-PAL South Asia tangkawp hmalakna niin Mizoramah Mission Foundation Movement (MFM)-in a kalpui dawn.
Minister chuan Mizorama hmeichhe chunga hleilenna a pung tih sawiin kum 2022-2023 chhung khan Women Helpline-ah case 3,094 report a awm a, February 2025-ah chuan case 12,750-ah a sang chho a. GBV tihbo lama hmalakna chu ramin a mamawh takzet a ni tiin hmeichhe dinhmun a that chuan chhungkua a thang a, khawtlang pawhin hma a sawn thin tih a sawi.
Minister chuan GBV Solve Project chuan hmeichhe chunga hleihlenna chungchang ringawt bitum lovin, naupang (mipa leh hmeichhia)-ten hemi chungchang zirtirna nasa tak an dawng dawn bawk a, hmeichhe chhawmdawl ngaite eizawnna tlak khawpa thiam thil zirtirna a keng tel dawn tih a sawi bawk.
He hunah hian Zoramthangi Chhangte, Director, Women & Child Development Department, Lalramchuanzela, Executive Director, Mission Foundation Movement bakah Aparajita leh J-PAL South Asia Team aiawhten thu an sawi.