Aizawl: MPCC President Lal Thanzara chuan tun hnaia central-a BJP sorkarin Mizoram Presbyterian Synod hnena income tax an thing chu Congress sorkar chhunga thleng ngai lo a nih thu a sawi.
Dampa bial by-election lo awm tur atan Congress party-in West Phaileng Dinthar kawna vantlang inkhawm Ningania an buatsaih hmanpuitu MPCC President chuan, tun tum inthlanah bial chhung mi candidate pahnih an awm tih a sawi a. ZPM candidate chu tling pawh ni se, a nih tur zawng zawng an nih tawh avangin MLA fang mai a nih dawn avangin vote lo mai a that a rin thu a sawi a. BJP chu Mizo Kristian tan chuan vote chi an ni lo tih a sawi a. BJP sorkar hnuaiah Kristian Missionary te khuan harsatna nasa tak an tawk mek a, Missionary an nih pawh an sawi ngam tawh lo va, NGO a thawk angten an insawi ngam tawk tawh tih a sawi.
MNF chungchang sawiin Lal Thanzara chuan, “An ngam loh chalah chil an hnawm a, kum 20 tal tawp rambuaiah kan awm phah a nih kha. Tuna an candidate hi an headquarter-ah pawh an hnawl a ni. An candidate hi in thlang tling anih chuan MNF hian an buai phah mai mai dawn a, 2028-ah pawh hian a thawh zawh ka ring lo,” a ti.
Tun hnaiah centrala BJP sorkarin Mizoram Presbyterian Synod chu income tax an thing tih sawiin MPCC President chuan, “Synod hotute pawh Central-ah income tax lam hotute dawrin an buai hle. Synod hian thuchhuahte siamin kohhran hrang hrang hnenah thuchhuah siamin lo fimkhur turin an hriattir a ni,” tiin, hetiang thil hi Congress kum 60 sorkar chhunga thleng ngai lo a ni tih a sawi.
Dampa bial by-election-ah INC candidate John Rotluangliana an thlan tlin chuan kum 2028-ah Congress an sorkar ngei a rin thu a sawi bawk.