Naktuk maiah Dampa bial bye-election neih a ni tawh dawn. Political party hrang hrangin theihtawp chhuahin tlin ngei tumin hma an la a, mipuitea an thawh nat dan a hriat thuai dawn e.
Party tinin theihtawp an chhuah lai hian tan ulh a awm thei viau dawn tih a chiang reng a, election commission lam inrawlh ngaiin inhekna a awm ta chiah bawk.
Party tinte leh MLA/Minister te pawh anmahni party awmna candidate tan theihtawp chhuahin kha chen an thawk a, an campaign a, mawi hnai takin an inkhar fel thei hlawm niin a lang.
Hetih lai hian kan ram hotu lu ber chief minister insawifiah ngaiin a awm tlat mai a, an platform leh nihna a sangin, mipuiin kan lo chik bik lo thei lo thin bawk si. A lehlamah veteran politician an ni tawh a, him chin leh chin lo thliar thiam fe tawh tura ngaih an nih laia khel zui hat tur khawpa a awm ta bik erawh a zia lo lam hret chuan a lang deuh.
Naktuk maia Dampa bial inthlanna awm turah pawh hian bial mipuiten an rilru leh ngaihtuahna uluk takin hmang se la, an zalenna thiang tak hmang thei se a duhawm hle.
Eng party leh tute pawh lo tling se, Dampa bial hmasawnna tur leh bial mipuite biak phak leh ban ngam tur, an tlukluh ngamna mi ni ngei se a va duhawm em.