MNF Treasurer Lalruatkima chuan Dampa bial by-election lo awm turah MNF official candidate Dr. R. Lalthangliana, Sr Vice President, MNF chuan sang takin hnehna a chan ngei an beisei tih a sawi.
Inrinnia Aizawl Press Club-a thu thar thehdarhtute a kawmnaah Lalruatkima chuan an MLA, Lalrintluanga Sailo a boral avanga by-election neih a ngai chu pawi a tih thu a sawi a. Candidate tha tak tak karah MNF-in Dr. R. Lalthangliana an nei chu lawmawm a tih thu sawiin, “A inpekna, taimakna leh remhriatnate fakawm kan tiin, inphah hniam taka mipui khawngaihna dila malsawm tlakah a khawsakna hian hlawhtlinna a thlen ngei kan beisei tlat a. Hnehna a chan ngei pawh kan beisei,” a ti.
Lalruatkima chuan Dr R Lalthangliana chu tawnhriat tam tak nei, mi thiam leh state sum mai ni lovin central fund nena tawngkawpa development sawi chhuak thei tur, development bulldozer a ni tih a sawiin, “ZPM sorkar buai tak, ram kaihhruaina kawnga kal ngaihna hre lo tak hian thurawn petu leh khalh ngiltu tha an mamawh hle a. Dr Thangtea hi opposition MLA tha tak leh sorkar finchhuahtu tha tak a ni dawn,” a ti bawk.
MNF treasurer chuan ZPM sorkar kal dan duhkhawp awm lo tak a awm avangin kum 2028-ah chuan MNF-in sorkarna a chang dawn tih a sawi a. MNF arsi lian Dampa mipuiin MLA-a an neih hi a pawimawhin bial tan kawng hrang hrangin an hlawkpui hle dawn tih a sawi.
Thawhlehnia Dampa bial by-election neih tura an campaign chhunga tlin duh luat avangin ZPM party hotuten dan dinglaite pawisa lovin an bawhchhia a. An insawi fiahna pawh ECI-in an pawmsak lo chu pawi a tih a sawi a. An campaign chhungin thahnemngaih luat avanga bial chhung mipuite rilru tina zawnga tawng leh chetna an nei palh a nih chuan Dampa bial mipuite hriatthiamna an ngen a. MNF Candidate-in hnehna a chan ngei theihna atana theihtawp chhuah a, tha leh zung sengtute chungah lawmthu a sawi a ni.