Bihar assembly inthlan thawh hnihna atan Pathianni tlaia campaign theih hun a tawp hnuah Thawhlehni tuk atang khan vote thlak a ni leh ta. Thla hnih dawn thu leh thil dang hmanga thuneitu zawk inchuha inbeihna boruak chu a tawp ta a ni.
Ningania inthlan thawh khatnaah khan vote 65% vel tlain Bihar inthlan chanchina vote tla atam ber tum a ni a. Zirtawpniah hian vote tlate chhiar a ni ang.
Thawh hnihaah hian chuhtu langsar tak tak an awm a. JD(U) Minister Sumit Kumar Singh-a chu Chakai-ah a ding a, BJP MLA Shreyasi Singh-a Jamui-ah, JD(U) Minister Leshi Singh-a Dhamdaha-ah leh BJP Minister Neeraj Kumar Singh-a Chhatapur-ah a ding.
Tun tumah hian bial 122-ah vote thlak a ni dawn a, a hma khan bial 121-ah inthlan a lo ni tawh.
Campaign theih ni tawp berah hian party hrang hrangten thahnem an ngai hle a. Union Home Minister Amit Shah leh Defence Minister Rajnath Singh te chu rorel lai tangrual tana thawk chhuakin Leader of Opposition Rahul Gandhi-a pawh eptu tangrual tan a inlan bawk.
Congress MP Gandhi-a hian Kishanganj leh Purnea district-ah hun hmangin Muslim tamna a ni a, anni thlawpna an hmuh that hi INDIA tan a hlawk hle thei tura ngaih a ni.
Ni eng emaw zat Bihar-a cham tawh, Shah-a pawhin a tawp niah hian BJP that lohna hmun, Sasaram leh Arwal-ah hun hmangin mipui rilru hmin tumin a bei.
Defence Minister Singh-a’n Uttar Pradesh nena an inrina, Aurangabad leh Kaimur district-ah hun a hmang bawk.
Bihar inthlanah hian campaign boruak a lianin inbeihna pawh a nasa a. Prime Minister Narendra Modi-a pawh roadshow a neih bakah hmun 14-ah vantlang inkhawmah hun a hmang a. Congress General Secretary Priyanka Gandhi Vadra-i pawhin a vawi khat nan Bihar-ah a campaign a, vantlang inkhawm vawi 10-ah a tel.
BJP hian an president, JP Nadda bakah union minister pahnih, Nitin Gadkari leh Shivraj Singh Chouhan an hmang rim hle a. An rorelna state chief minister pathum – Yogi Adityanath, Himanta Biswa Sarma leh Mohan Yadav te pawh campaign hian an thawk chhuak.
Hetih lai hian a zawna vawi nga nana chief minister nih leh tum, JD(U) hruaitu, Nitish Kumar-a erawh a reh hle thung.
INDIA-in chief minister atana an zawrh, RJD hruaitu, Tejashwi Yadav-a pawh a thawk rim hle a, eptu tangrual tana thawk nasa ber zinga mi a ni.