Indian police-te chuan kum 10 chuang hnua an khawpui, Delhi-a car puak, mi pariat thih phahna thleng chu ‘firfiaka chetna’ angin an chhui dawn tih Thawhlehni khan an sawi.
Unlawful Activities (Prevention) Act hi India-a firfiaka chetna dona dan lian ber a ni a. ‘Firfiakna’ thil nena inzawm chhuina leh a hremna dan pawh na tak a ni.
Red Fort bul maia Thawhtannia car-a bomb tihpuahah hian mi pariat thiin mi 20-in hliam an tuar bawk a. Mi maktaduai 30 chuang chenna khawpuiah hian venhimna a that avangin hetiang beihna lian hi a thleng zen zen lo va, a thlen takah hian state dang leh ram chhunga hmun pawimawh zualah venhimna tihkhauh thar nghal a ni.
Deputy Commissioner of Police Raja Banthia chuan Delhi police-in firfiaka chetna dona dan tlawhchhana thubuai an ziah luh bakah explosives act leh dan bawhchhiatna dang dan tlawhchhana an ziah luh thu a sawi.
“Chhui hna hi thawh tan chauh a la ni a, tuna thil sawi thui vak theih pawh a la ni lo,” tiin Banthia hian Thawhlehni tuk khan thuthar lakhawmtute hnenah a sawi.
Ni tin mi sing telin an tlawh thin, khawpui hlui hmun lun, bazar leh khualzin tamna hmunah hian Thawhtanni tlaia bomb a puah hnuah khan bazarte an inkhar nghal vek a, Thawhlehni tukah erawh dan pangngaiin an inhawng leh tawh hlawm.
Car a puah hnuah khan a puahna hmun tak erawh khar a ni a, lirthei tlan dan pawh thlak a ni a, forensic thiamte chuan a hmunah hian thil an zir chiang mek.
Police chuan car inzui tlan muang tak takte traffic signal sena an din fel chian, tlai dar 06:52-ah a puak tih an sawi a, a bul hnai lirtheite pawh a chhe nasa hle.
A puahna hmun hi metro station bul lawk a ni a, a puah hnuah hian lirthei ruangruh leh a darhte chu a tla darh nghal nuai hlawm a ni.
Car puakah ber hian tute nge chuang tih Thawhlehni chhun thleng khan hriat theih a la ni lo va, an thi ngei tura ngaih a ni a. Police chuan car neitu pawh an chhui zui nghal bawk.
Union Home Minister Amit Shah-a chuan Thawhtanni zanah khan thil chhuitu leh venhim hna thawktuten ‘kil tin atangin’ an chhui nghal a, an hre fiah thuai dawn tih a sawi.
Thi chhungte chu a bul lawka Lok Nayak damdawi inah pung khawmin an chhungte finfiah an tum a. “Ka unau (cousin) a tel ve tih kan lo hria a, a thi nge a dam nge na takin a inhliam tih pawh kan la hre lo,” tiin pakhat chuan a sawi.
Red Fort hi tual chhung mite chuan Lal Qila tiin an sawi a, kum zabi 17-na hun laia Mughal lalin Persian leh Indian architectural style-a a sak a ni a, kum tin mi tam takin an tlawh ziah a ni.
August 15-a India-in zalenna a neih champha a lawmna hmun niin prime minister-in kum tin mipui hnena thuchah a puanna hmun a ni.
Prime Minister Narendra Modi-a chu Bhutan tlawh turin Thawhlehni tuk khan a chhuak a. April thla khan Saudi Arabia a tlawh laiin Jammu & Kashmir-ah mi firfiakten mi 26 an thah avangin a hun hmain a lo haw tawh a ni.